Մարդկանց մղում ենք հիվանդություն ձեռք բերեն, հետո էլ մտածում, թե ինչպես բուժել․ աղի սահմանափակումը Փաշինյանը կարևորագույն ռեֆորմ որակեց (տեսանյութ)

«Հանրային սննդի օբյեկտներում աղի օգտագործման չափանիշի մասին մեր ռեֆորմը հիմնականում հումորի թեմա է դառնում»։ Այսօր, կառավարության նիստում ասաց Նիկոլ Փաշինյանը՝ աղամանների հետ կապված հայտնի որոշումը որակելով որպես կարևորագույն ռեֆորմ։

Նրա խոսքով՝ դա հումորի թեմա է դառնում, որովհետև ոչ բոլորը գիտեն, թե դրա գերօգտագործումն ինչ ազդեցություն է ունենում հանրային առողջության վրա։

«Հետևում եմ, թե ինչ արձագանքներ կան առաջիկայում սպասվող ռեֆորմի մասին, որը վերաբերում է հանրային սննդի օբյեկտներում աղի օգտագործմանը։ Երբ ծխելու կամ աղի օգտագործման չափանիշով բոլոր ստանդարտները կրկնակի, եռակի գերազանցում ենք, հետո կանգնում ենք առողջապահական խնդրի առաջ և պետական բյուջեի ծախսերով չենք կարողանում մեր երկրի քաղաքացիների բոլոր առողջապահական խնդիրները հոգալ։

Մենք կարծես քաղաքացիներին մղում ենք, որ հնարավորինս շատ հիվանդություններ ձեռք բերեն, որ հետո մտածենք, թե ինչպես բուժել։ Առողջ ապրելակերպը պետք է լինի մեր ռազմավարական մոտեցումը, և մենք գնալու ենք այս ճանապարհով»,- ասաց նա։