Լարվածությունն Արցախի հատվածում է՝ ադրբեջանցիների կողմից առաջախաղացում չկա․ Արման Սարգսյան (տեսանյութ)

Եկեք ես կոնկրետ վայրով չասեմ, բայց ինչպես բոլորիս է հայտնի, վերջին շրջանում, իրավիճակը լարված է, կարող ենք բնորոշել կայուն լարված: Այս մասին այսօր ԱԺ-ում լրագրողների հետ զրույցում ասաց Պաշտպանության փոխնախարար Արման Սարգսյանը՝ արձագանքելով սահմանին տիրող իրավիճակի հետ կապված հարցերին։

«Ամսի 14-ի գիշերվանից և այսօր ևս մենք թեև լուրջ խնդիրներ չենք ունեցել, բայց իրավիճակը շարունակում է մնալ լարված: Սյունիքի մասին չի խոսքը, Արցախի հատվածում է լարվածությունը: Ձեռնարկվում են միջոցներ, որպեսզի բանակցությունների և այլ գործողությունների միջոցով հնարավոր սադրանքների, հնարավոր էսկալացիայի խնդիրներ չծագեն»,- ասաց նա:

Արման Սարգսյանը հերքեց լուրերը, ըստ որոնց, ադրբեջանցիները առաջխաղացում են ունեցել: Մասնավորապես, դիտարմանը, թե Սյունիքում Ներքին Հանդի բնակիչները պնդում են, որ ադրբեջանցիները 1 կմ առաջ են եկել, Արման Սարգսյանն ասաց. «Ես ասում եմ, որ այս պահին իրավիճակը կայուն է, սակայն չի կարելի բնորոշել, որ խնդիր չկա: Ոչ, Հայաստանի սուվերեն տարածք չեն մտել, առաջխաղացում չեն ունեցել»:

Ճշտող հարցին, թե միգուցե եղել է նման բան, բայց փոխնախարարը դեռևս տեղյակ չէ, քանի որ ԱԺ-ում առավոտից նիստի է մասնակցում, նա արձագանքեց. «Ես չեմ ասի՝ գուցե եղել է, ես կասեմ՝ եթե նման բան եղած լինի, ՊՆ-ի համապատասխան ստորաբաժանումները համարժեք քայլեր կձեռնարկեն, և դրա մասին դուք կտեղեկանաք»:

Ըստ Արման Սարգսյանի՝ ադրբեջանական կողմի հայտարարություններն ընդհանուր խուճապային, վախի մթնոլորտ ստեղծելու, հայաթափման գործընթաց նախաձեռնելուն միտված քայլեր են. «Քայլեր են անում, որ լարված վիճակը պահպանվի: Ես առավոտվա դրությամբ կարող եմ ասել, երբ ես եկել եմ նիստի, այդ պահի դրությամբ ես տեղեկացված եմ եղել, որ իրավիճակը կայուն է: Մեր ստորաբաժանումները զգոն են, հետևում են ընթացքին և անհրաժեշտության դեպքում կանխարգելիչ միջոցառումներ կիրականացնեն»,- ասաց Սարգսյանը։

Միևնույն ժամանակ նա չի բացառում, որ հնարավոր են սադրանքներ․ «Կապված աշխարհաքաղաքական փոփոխությունների հետ՝ միգուցե հնարավոր են սադրանքներ, քայլեր հակառակորդի կողմից ձեռնարկվեն, սակայն կարող եմ վստահ ասել, որ մեր կողմից որևէ ագրեսիվ քայլ չի իրականացվում»,- ասաց Սարգսյանը՝ հավելելով, որ չի եղել դեպք, որ ադրբեջանցիների ագրեսիային հայկական կողմը չպատասխանի։