Այն մարդիկ, որ փողոցից գնում են միս, չեն հարգում սեփական անձն ու ընտանիքը. ՍԱՏՄ ղեկավար

Սննդամթերքի անվտանգության տեսչական մարմինը մի քանի օրից արդեն կսկսի ռիսկի գնահատման հիման վրա իրականացնել սննդամթերքի անվտանգության վերահսկողություն, որը կլինի ավելի արդյունավետ։ Այս մասին ասուլիսում հայտնեց տեսչական մարմնի ղեկավար Գեորգի Ավետիսյանը:

Միևնույն ժամանակ նա վստահեցրեց, որ սննդամթերքի անվտանգությն ոլորտում խնդիրների վերացում որևէ տեղ՝ նույնիսկ ամենազարգացած երկրներում, չի կարող լինել:

Ինչ վերաբերում է վերահսկողության իրականացմանը, ապա Ավետիսյանը նկատեց, որ ողջ ծավալով իրականացրել են պլանային ստուգումները, նաև բողոքների հիման վրա չնախատեսված 300 ստուգում, ինչը կազմում է նախատեսվածի 30 տոկոսը։

«Ցանկացած մարդ, որ մեզ զանգահարում ու բողոքում է ոլորտի խնդիրներից, մեզ հնարավորություն է տալիս օգտագործել վերահսկողության ևս մեկ գործիք: Այս պահին առավել խնդրահարույց է կենդանական ծագման սննդի ճյուղը։ Օրինակ՝ այս պահին շատ են բողոքներ մսի շուկայից։ Շատ դեպքերում մորթը կատարվում է բակերում, միսը վաճառվում է փողոցում»,- ասաց ՍԱՏՄ ղեկավարը:

Նա տեղեկացրեց, որ այս պահին ձեռնարկում են այլ մեխանիզմներ՝ թույլ չտալու վաճառել ոչ սպանդանոցային ծագման միս։

«Բազմիցս ասել եմ, չեմ զլանա ևս մեկ անգամ կրկնել։ Այն մարդիկ, որ փողոցից գնում են կենդանական ծագման մթերք, չեն հարգում սեփական անձն ու ընտանիքին։ Սա մեր ամենալուրջ խնդիրն է, ամենամեծ գլխացավանքը։ Կարծում եմ՝ ոստիկանության հետ միասին կկարողանանք այս խնդրին լուծում տալ»,- ասաց Գեորգի Ավետիսյանը։