Արցախից որևէ բան Ուկրաինա չի գնացել և ոչ էլ կարող էր գնալ. Արցախի ԱԺ պատգամավոր

Մարտի 7-ին Արցախից 14 տոննա հումանիտար օգնություն տեղափոխվեց Ռուսաստան, ինչը, ցավալի է, սակայն փաստ, որ ճիշտ չընկալեցին կամ որոշ քաղաքական ուժեր պարզապես օգտվելով իրավիճակից փորձեցին ներկայացնել այնպես, ինչպես իրենց է հարմար: Արցախից որևէ բան Ուկրաինա չի գնացել և ոչ էլ կարող էր գնալ: Օգնությունն ուղարկվել է Ռուսաստանի Դաշնություն և դա մեկ բան է փաստում, որ այն երկրները, որոնք ՌԴ-ի հետ են, սատարում են ՌԴ-ին, ապա ուղարկում են հենց նրան, իսկ Ուկրաինային սատարող երկրները՝ Ուկրաինա: Այս մասին այսօր «Հայելի» ակումբի տեսազրույցի ժամանակ Արցախի Հանրապետության ԱԺ պատգամավոր Մետաքսե Հակոբյանը:

«Ռուսաստանի պաշտպանության նախարարության մամուլի խոսնակը ևս հայտարարեց, որ Լեռնային Ղարաբաղից հումանիտար օգնություն է ուղարկվել ՌԴ: Այդպիսով՝ նրանք Արցախը դիտարկեցին, որպես առանձին սուբյեկտ, միավոր: Եվ նման բնորոշումն առաջին անգամը չէր: Իհարկե, այս ամենին հաջորդեց Ադրբեջանի արտաքին գործերի նախարարության վայնասուն հայտարարությունը, որտեղ նրանք ուղղակի սպառնացին և՛ Արցախում բնակվող հայերին, և՛ ռուս խաղաղապահներին, ասելով, թե արդյոք ՌԴ-ն չի անհանգստանում սադրանքներից՝ «Ադրբեջանի տարածքում»: Դա իրենց խոսքն է, նրանք նկատի ունեին Լեռնային Ղարաբաղը: Այդ ամենից հետո նրանք անցան գործի և ժամեր անց մենք Ստեփանակերտում զգացինք շատ տարօրինակ պայթյուններ, այնուհետև՝ գազամատակարարումը դադարեց: Այսինքն՝ այստեղ, առանց որևէ տրամաբանական հետևություններ անելու, կարելի էր հասկանալ, որ գազատարը պայթեցվել է՝ Արցախ մտնող միակ գազատարը»,-ասաց Հակոբյանը:

Նրա խոսքով՝ այսօր մեր հարևան պետությունը՝ քոչվոր ցեղը, մեզ զրկելով տարրական պայմաններից ապրելու, վակուումային իրավիճակ է ստեղծել: Եվ Արցախն այս եղանակային պայմաններում մնացել է առանց գազ: Վերջինս ունի նաև էներգամատակարարման խնդիր: