Հայաստանը մուտք է գործել ժողովրդավարական երկրների «բարձրագույն լիգա». Փաշինյան (տեսանյութ)

Շատ կարևոր արձանագրում է տեղի ունեցել։ Այս մասին կառավարության նիստում հայտարարեց Նիկոլ Փաշինյանը` ներկայացնելով «Varieties of Democracy» ինստիտուտի հրապարակած 2022-ի ժողովրդավարության զեկույցը:

Փաշինյանը նշեց, որ զեկույցը կրում է «Ավտորիտարիզմը փոխում է իր բնույթը» խորագիրը և, ըստ նրա, շատ կարևոր է Հայաստանի համար:

«Մեր երկրի պատմության մեջ առաջին անգամ ՀՀ-ն բնորոշվում է ոչ թե «ընտրական ավտորիտարիզմ» տերմինով, այլ որպես «ընտրական ժողովրդավարություն»: Սա, ըստ էության, նշանակում է, որ ժողովրդավարության առումով Հայաստանի Հանրապետության դասակարգման փոփոխություն է տեղի ունեցել։

Այսինքն՝ նույնիսկ 2018-ի ոչ բռնի, թավշյա հեղափոխությունից հետո այս կազմակերպությունը շարունակում էր Հայաստանը դիտարկել որպես ընտրական ավտորիտար համակարգ ունեցող երկիր, որի իմաստը հետևյալն էր, որ կա ավտորիտար համակարգ, որն ընտրական պրոցեսն օգտագործում է սեփական վերարտադրությունը կազմակերպելու համար»,- ասաց նա:

Փաշինյանը բացատրեց, թե ինչով է բացատրվում նման բնորոշման էությունը։

«Այսինքն՝ ընտրությունը ոչ թե իշխանության վերարտադրության գործիք է, այլ իշխանության ձևավորման գործիք է: Կարող ենք արձանագրել, որ 2021-ի արտահերթ ընտրություններով Հայաստանը մուտք է գործել ժողովրդավարական երկրների «բարձրագույն լիգա»», - հայտարարեց Փաշինյանը։

Մանրամասները՝ տեսանյութում