Վաղարշապատում ոստիկանները գցել են գետնին ծեծել ու ոտքով հարվածել 18֊ամյա երիտասարդին. ահազանգ

Վաղարշապատի ոստիկանության բաժնում դաժանաբար են վարվում: Newspress.am-ն արդեն հերթական ահազանգ է ստանում։ Այս անգամ այն Վաղարշապատի մի բնակչուհուց էր, ով վրդովված ներկայացրեց, թե ինչպես են ոստիկանները դաժանաբար ծեծել իր 18֊ամյա որդուն` ոչնչի համար։

«Տարել են 4֊րդ հարկ, գցել են գետնին ու ծեծել։ Անգամ ոտքն են վրան դրել, պատկերացնո՞ւմ եք»,- ասաց վրդովված մայրը։

Մեզ հետ զրույցում, երիտասարդը (ում անունը չենք նշի) հաստատեց մոր խոսքերն ու մանրամասն պատմեց, թե ինչպես է տեղի ունեցել դեպքը։

Նա իր զարմիկների հետ այցելել է կալանքի տակ գտնվող իր բարեկամին` տեսակցության։ Հանկարծ տղայի հեռախոսի մեջ երաժշտություն է միացել։ Մինչև նա կանջատեր ձայնը` ոստիկանը մոտեցել է տղային ու կոշտ տոնով հարցրել. «Չգիտե՞ս, թե որտեղ ես գտնվում, էս ի՞նչ ա»։

Տղան հանգիստ բացատրել է, որ գիտակցում է, թե որտեղ է, ասել է, թե ինչու է այդտեղ ու բացատրել, որ երաժշտությունը հանկարծ է միացել, ինչին ոստիկանը արձագանքել է, թե` ինչո՞ւ է իր հետ մուննաթով խոսում։

«Որտեղի՞ց իմ տոնի մեջ մուննաթ տեսաք, ես այդպես եմ խոսում։ Ինչի՞ պետք է մուննաթ գամ, եթե ինձ վատ բան չեք արել»,- ասել է երիտասարդը։

Սակայն նրա այս պատասխանը ոստիկանին դուր չի եկել. «Լեզվիդ ես տալիս»,-արձագանքել է ոստիկանն ու լծվել հայտնի` «ասֆալտին փռել, պատին ծեփել», օպերացիային։ 

Երիտասարդը պատմում է, որ ոստիկանների ծեծն ուղեկցվել է նրանց հայհոյանքերով։ Իսկ երբ տղան բղավել է, որ չխփեն, թողնեն իրեն ու, որ ինքը կբողոքի` ոստիկաններից մեկը ծաղրով ու սպառնալի տոնով նկատել է. «Ում ուզում ես` բողոքի: Ու՞մ պետք է բողոքես` քեռուդ ես բողոքելու, թե՞ քեռուդ ընկերոջը»...

Ոստիկանության կողմից բռնության ենթարկված երիտասարդը, մոր ուղեկցությամբ, դիմել է Վարղարշապատի հիվանդանոց:

Այնտեղ իմանալով, որ կապտուկների հեղինակը ոստիկանությունն է, խուսափել են դիմել համապատասխան միջոցների ու տղային ճանապարհել են տուն` ասելով. «Հա ի՞նչ, քերծվածք է էլի»...

Երիտասարդը պատմում է նաև, որ մինչ այդ մոր հետ գնացել են ոստիկանություն։ Այնտեղ միջադեպի ականատես ոստիկաններից մեկն ասել է, թե նման բան չի եղել։ Երբ տղան պնդել է, որ եղել է հենց ոստիկանի աչքի առաջ, վերջինս ասել է, թե իբր իր ներկայությամբ չի եղել նման բան: Իսկ քանի որ տղայի մայրն ասել է, որ կդիմի Ներքին անվտանգության վարչություն, ուստի արդեն հիվանդանոցից վերադառնալուց հետո նրանց զանգահարել է, Վաղարշապատի ոստիկանության բաժնի ոստիկանապետը և հորդորել ներքին անվտանգությանը դիմելուց առաջ անպայման նախ իրեն տեսնել։

Իհարկե, մայրը չի պատրաստվում հանդիպել ոստիկանապետին։ Նա պատրաստ է գնալ մինչև վերջ ու պատասխանատվության ենթարկել մեղավոր ոստիկաններին։