2015թ.-ը միասնականության ու ազգային զարթոնքի տարի էր. ԱԳՆ

Հայաստանի արտաքին գործերի նախարարությունը շնորհավորանք է հղել Ամանորի և Սուրբ Ծննդյան տոների կապակցությամբ։

Շնորհավորանքում ասվում է.

«Հարգելի քաղաքացիներ,

Սիրելի հայրենակիցներ,

Անցնող 2015թ.-ն խորհրդանշական տարի էր և, դրանով պայմանավորված, խիստ հագեցած: Մենք փորձեցինք ներդնել հնարավոր ջանքերը` իրականացնելու մեր գերակայությունները: Չնայած ի հայտ եկող մարտահրավերներին` մեր հավաքական վճռականությունը, հավատը մեր նպատակների արդարացիության հանդեպ, մեզ առաջ էր մղում. 2015թ.-ն միասնականության, համերաշխության և վերածննդի ու ազգային զարթոնքի տարի էր:

Տարվա ընթացքում շարունակեցինք բոլոր ուղղություններով ՀՀ արտաքին քաղաքական օրակարգի իրականացումը. Հայաստանը դարձավ ԵԱՏՄ անդամ, հյուրընկալեց միջազգային նշանակության համաժողովներ, ստանձնեց ՀԱՊԿ-ում նախագահությունը, մեկնարկեց ԵՄ հետ նոր իրավական փաստաթղթի շուրջ բանակցությունները, միջազգային կազմակերպություններում հանդես եկավ կարևոր նախաձեռնություններով, որոնք արժանացան միջազգային հանրության աջակցությանը:

Ցավոք, ձեռքբերումների հետ մեկտեղ, մենք անդառնալի կորուստներ էլ ունեցանք. յուրաքանչյուր զինվորի, քաղաքացիական անձի զոհվելը միայն իրենց հարազատների կորուստը չէ, այլ` բոլորիս:

Գալիք տարում բոլորին մաղթում ենք առողջություն, դրական էներգիա, նոր գաղափարներ, ձեռքբերումներ, լավատեսություն, բարեկեցություն բոլոր ընտանիքներին, իսկ մեր Հարենիքին` խաղաղություն:

Շնորհավորում ենք սահմանին կանգնած հայ զինվորին. մենք երբեք չենք մոռանում աշխարհի տարբեր ծայրերում կայացվող որոշումների ու մեր խրամատների միջև ուղղակի կապը:

Դրանով պայմանավորված` չենք բարձրաձայնում իրականացվող քայլերի մասին` մեր զինվորի ֆիզիկական անվտանգությունը դիտարկելով որպես հրամայական:

Շնորհավորում ենք ինչպես Երևանում, Հանոյում, Մադրիդում, Բրազիլիայում, Մոսկվայում, այնպես էլ` Հալեպում, Դամասկոսում, Բաղդադում և աշխարհի մյուս ծայրերում ծառայություն իրականացնող հայ դիվանագետին` մաղթելով առողջություն և անմնացորդ նվիրում, համբերատարություն և վճռականություն: Եվ թող մեր ընտանիքների անդամներն ըմբռնումով մոտենան մեր ծառայությանը և դրանից բխող հանգամանքներին»: