Եթե ինձ էր վերաբերվում Փաշինյանի «թալանչի» բառը՝ մենք մեր հարաբերությունները կպարզենք դատարանում. Վահե Հակոբյան

ԱԺ «Հայաստան» խմբակցության պատգամավոր Վահե Հակոբյանի գնահատմամբ, ի դեմս Նիկոլ Փաշինյանի, այսօր մենք գործ ունենք անկայուն հոգեվիճակ ունեցող անձի հետ:

Նա ԱԺ-ում լրագրողների հետ զրույցում նշեց, որ Փաշինյանի կողմից երեկ ԱԺ-ում տեղի ունեցավ հերթական էլեմենտար մանիպուլյացիոն քայլը։

Անդրադառնալով ՊԵԿ հայտարարությանը՝ «Զանգեզուրի պղնձամոլիբդենային կոմբինատ» ՓԲԸ նախկին գործադիր մարմնի ղեկավարի անձնական միջոցներից վճարվել է 15 մլրդ դրամ հարկային պարտավորություն, Վահե Հակոբյանը համոզմունք հայտնեց, որ ՊԵԿ-ը հատուկ որևէ անուն չի հրապարակել, ինչով հնարավորություն է տվել Նիկոլ Փաշինյանին այս թեման բարձրացնել պոպուլիստական մակարդակի և իր հերթական ամպագոռգոռ հայտարարություններն անել։

«Նիկոլ Փաշինյանը երեկ ասում էր՝ գլուխները կախ բերել են, մուծել են և այլն։ Հարց՝ ո՞վ է բերել մուծել, ո՞ւմ գլուխն է եղել կախ, ինչի՞ հետևանքով է բերել մուծել, ի՞նչ թալանի մասին է խոսքը, ո՞ւմ է դա առհասարակ վերաբերում»,- ասաց Վահե Հակոբյանը։

Նա նաև հավելեց, որ հարց է ուղղելու Փաշինյանին, թե ո՞ւմ նկատի ուներ երեկ ԱԺ-ում «թալանչի» ասելով։

«Եթե ինձ էր վերաբերում, մենք մեր հարաբերություններն արդեն կպարզենք դատարանում։ Ինքը, ինչպես միշտ, խոսեց վերացական»,- ասաց ընդդիմադիր պատգամավորը։

Վահե Հակոբյանն ընդգծեց, որ ինքն օգոստոսի 2-ից որևէ առնչություն չունի «Զանգեզուրի պղնձամոլիբդենային կոմբինատ» ՓԲԸ-ի հետ։

«Ինչ վերաբերում է ինձ վերագրվող փայամասին, արդեն հոգնել եմ ասել՝ երբևէ չեմ ունեցել որևէ փայամաս այդ հիմնարկում։ Մինչև 2016 թվականն աշխատել եմ գլխավոր տնօրենի առաջին տեղակալ, 2019 թվականից խորհրդի անդամ։ Սրանք տարբեր ինստիտուտներ են՝ խորհուրդ, բաժնետեր, գործադիր մարմին»։