«Ամանորի գիշերը մեր հավաքը խափանել չեն կարող». «Նոր Հայաստան»

«Նոր Հայաստան» հանրային փրկության ճակատի «Ընդդիմության միասնական շտաբ»-ը հանդես է եկել հայտարարությամբ.

«Նոր Սահմանադրությունը կեղծ հանրաքվեով ընդունված համարելուց հետո վարչախումբը ձեռնամուխ է եղել այդ «սահմանադրությամբ» ամրագրված միակուսակցական համակարգը գործնականորեն ու վերջնականապես հաստատելու գործին: Բնականաբար՝ ամեն այլընտրանք բացառող այդ համակարգի հաստատման ճանապարհի առաջին արգելքը դրա կանոններից դուրս գործելու ռազմավարություն որդեգրած «Նոր Հայաստան» հանրային փրկության ճակատն է, ուստի վարչախմբի առաջին քայլը դարձավ դեկտեմբերի 31-ին Ազատության հրապարակում Ճակատի նախաձեռնած այլընտրանքային ամանորյա հավաքի խափանումը:

Այդ նպատակով վարչախումբը կազմակերպել է հատուկ գործողություն, որի մեջ է ներգրավել ոչ միայն ոստիկանությանը, այլև Երևանի քաղաքապետարանին, Մշակույթի նախարարությանը և Ալ. Սպենդարյանի անվան օպերայի և բալետի ազգային ակադեմիական թատրոնի ղեկավարությանը: Նախ՝ Երևանի քաղաքապետարանը, ինչպես ակնհայտ է դարձել Ազատության հրապարակում տոնածառ տեղադրելու վերաբերյալ հավաքի իրազեկման լրացման դիմումի քննարկման ընթացքում, հրահանգ է ստացել անհեթեթ պատճառաբանություններով խուսափել տոնածառը որպես հավաքի ընթացքում օգտագործվող առարկա համարելու իր պարտականությունից, որպեսզի ոստիկանությանը հնարավորություն ընձեռնվի արգելելու տոնածառի տեղադրումը:

Այնուհետև՝ Օպերայի և բալետի ազգային ակադեմիական թատրոնի ղեկավարությունը, չարաշահելով մշակույթի օջախի անունից դիմելու հանգամանքը, հավաքի կազմակերպիչներին խնդրել է դեկտեմբերի 27-ին նախատեսված համերգի ընթացքում թատրոնի բոլոր դռները բացելու նպատակով մի քանի ժամ հանել դռներից մեկի վրա փակցված քարոզչական պաստառը: Հետագայում, երբ կազմակերպիչները փորձել են նորից կախել պաստառը, ոստիկանությունը ապօրինի կերպով բռնությամբ արգելել է նրանց փորձերը, ինչից հետո ակնհայտ է դարձել, որ թատրոնի տնօրինությունն այդ դավադիր գործողության մասնակից է: Մինչդեռ Արցախյան շարժման ժամանակներից մինչ օրս ձևավորված նախադեպի և համաչափության պահանջի իրավունքով թատրոնի պատին նույն տեղում պաստառ փակցնելը չի կարող որևէ կերպ արգելվել:

«Ընդդիմության միասնական շտաբ»-ը հայտարարում է, որ այս ապօրինի գործողությունները չեն կարող խափանել Ազատության հրապարակում դեկտեմբերի 31-ին անցկացվող ամանորյա հավաքը և մեր քաղաքացիները դրա շնորհիվ ինչպես տոնի, այնպես էլ քաղաքական հեռանկարի առումներով տեսնելու են կոմունիստական խորհրդանիշ հնգաթև կարմիր աստղերով զարդարված տոնածառերի և նրանց շուրջը խմբված կոռուցպիոն կերպարների այլընտրանքը»,- մասնավորապես ասված է հայտարարության մեջ: