Washington Times. Չինաստանն ուկրաինական հակամարտության սրման մեջ մեղադրում է ԱՄՆ-ին

Չինաստանի արտաքին գործերի նախարարության մամուլի խոսնակ Խուա Չունինը հրաժարվել է Ուկրաինայում Ռուսաստանի ռազմական գործողությունը «ներխուժում» անվանելուց։ Ավելին, նրա խոսքով, հենց Վաշինգտոնն է պատերազմ հրահրել Կիևին՝ զենք մատակարարելով և «կեղծ ահազանգերով»։ Իր մեկնաբանություններով նա հասկացրել է, որ Պեկինն այս հարցում Մոսկվայի կողքին է: Այդ մասին ասվում է The Washington Times-ի հոդվածում:

Չինաստանի իշխանությունները «էլ ավելի են հակված աջակցելու ռուսական ռազմական միջամտությանը» Ուկրաինայում։ Նրանք Արևելյան Եվրոպայի հակամարտության համար մեղադրել են ԱՄՆ-ի վրա՝ ակնհայտորեն ցույց տալով, որ ներկայիս ճգնաժամում իրենք Վլադիմիր Պուտինի կողքին են:

Չինաստանի արտաքին գործերի նախարարության խոսնակ Հուա Չունինը հրաժարվել է Մոսկվայի ռազմական գործողությունը «ներխուժում» անվանել։ Նրա խոսքով՝ մի քանի տարբեր գործոններ են հանգեցրել ստեղծված իրավիճակին, առաջին հերթին՝ Ուկրաինայի զինված ուժերին ամերիկյան զենքի մատակարարումը։

«Միացյալ Նահանգներն արդեն որոշ ժամանակ է սրում է լարվածությունը և բորբոքում պատերազմը: Գիտե՞ք, թե ԱՄՆ-ն որքան զենք ու զինամթերք է ուղարկել Ուկրաինա»,- հռետորական հարց է տվել Չունինը: Նրա կարծիքով, եթե Վաշինգտոնն ավելին աներ խաղաղության հաստատման և Մոսկվայի վախերը հարգելու համար, ապա պատերազմից հնարավոր կլիներ խուսափել։

Լրագրողների այն հարցին, թե Ուկրաինայի պես ինքնիշխան պետությունն իրավունք ունի՞ զենք գնել, Չինաստանի ԱԳՆ ներկայացուցիչը պատասխանել է՝ եթե երկու հոգի վիճեն ու պատրաստվեն կռվի, կողմնակի մարդիկ զինե՞ն մի կողմին, թե՞ դեռ փորձեն կանխել բախումը։ 

«Հիմա կրակի վրա յուղ լցնելու ժամանակը չէ, այլ մենք պետք է համատեղենք մեր ջանքերը՝ կրակը մարելու և աշխարհը փրկելու միջոց գտնելու համար»,- շեշտել է նա:

Բացի այդ, Հուայի կարծիքով, ԱՄՆ-ն սադրել է Ռուսաստանին՝ հայտարարելով այն մասին, որ Ուկրաինայի վրա «հարձակումը» տեղի կունենա փետրվարի 16-ին։ Նա կարծիք է հայտնել, որ Վաշինգտոնն միայն իր «կեղծ ահազանգով» հակամարտությունը մոտեցրել է իրականությանը։

«Նրանք, ովքեր, Միացյալ Նահանգների օրինակով, կրակ են բորբոքում, իսկ հետո մեղքը բարդում են ուրիշների վրա, իրենց իսկապես անպատասխանատու են պահում»,- ասել է պաշտոնյան։ «Այն անձը, ով սկսել է այս հրդեհը, պետք է մտածի, թե ինչպես հնարավորինս շուտ հանգցնել այն»:

Վերջերս կայացած մամուլի ասուլիսում Ջո Բայդենը խուսափեց պատասխանել այն հարցին, թե արդյոք ԱՄՆ-ն մտադիր է համոզել Չինաստանին «մեկուսացնել» Ռուսաստանին։ Նախագահի՝ մեկնաբանություններից հրաժարումը կարող է փաստել, որ նրա վարչակազմը դեռ հույս ունի այս հարցում իր կողմը գրավել կայսրությանը,- պնդում է հրատարակությունը: 

Բանն այն է, որ Պեկինն առանցքային դեր է խաղալու կործանարար պատժամիջոցներով Պուտինի վրա ճնշում գործադրելու փորձի մեջ։ ՉԺՀ-ն կարող է Կրեմլին տրամադրել «կենսական աջակցություն և օգնություն՝ կանխելու ռուսական տնտեսության փլուզումը», գրում է The Washington Times-ը: