«Ոչ, պարոն Քոչարյան, ես կխոսեմ էնքան, ինչքան անհրաժեշտ կգտնեմ». Հայկ Սարգսյանը՝ Անդրանիկ Քոչարյանին (տեսանյութ)

«Ինձ գրել է զոհված զինծառայողի կին, որի երեք զավակներից մեկը մահացել է հոսանքահարումից, ամուսինը՝ պատերազմում է զոհվել, և այսօրվա կարգավորումներով նրա երկու զավակները պետք է գնան զինվորական ծառայության: Իսկ օրենքն ընդունվելուց հետո նրանք երկուսն էլ կազատվեն պարտադիր զինծառայությունից, քանի որ ընտանիքում ունեն պատերազմի ժամանակ կամավորական զոհված անձ»։ Այս մասին ԱԺ պաշտպանության և անվտանգության հարցերի հանձնաժողովում «Զինվորական ծառայության և զինծառայողի կարգավիճակի մասին» օրենքում փոփոխություն կատարելու մասին» օրենքի նախագծի քննարկման ժամանակ ասաց ՔՊ-ական պատգամավոր Հայկ Սարգսյանը։

Նա նաև նմանատիպ այլ օրինակներ բերեց և նշեց, որ այդ մաւրդկանց թիվը բավականին մեծ է։ Հայկ Սարգսյանը նկատեց, որ վերջին 8 տարվա մեջ մենք 60 հազարից ավելի զորակոչիկի ազատել են զինծառայությունից: Համաձայն եմ, որ նրանց կեսն արժանի են ազատվելու զինծառայությունից, բայց մյուս կեսը, համոզված եմ, կարող է օգտակար լինել բանակին:

«Ես օրինակ բերեցի կառավարությունում քննարկման ժամանակ, որ եթե դու չունես հակաօդային լավ պաշտպանություն ու դիրքում ունես 20 զինծառայող, և եթե ԱԹՍ է գալիս, շատ լավ է, որ դու ունես 20 զինծառայող, ոչ թե 40, որովհետև նա կխփի ու դու կունենաս ավելի շատ վիրավորները ու զոհեր: Պատգամավորներից շատերը տեղյակ չեն, թե վերջին 10-20 տարում ինչպես է պակասել մեր զորակոչի թիվը»,- ասաց պատգամավորը։

Հանձնաժողովի նախագահ Անդրանիկ Քոչարյանը ընդհատեց Հայկ Սարգսյանին՝ նշելով, որ նա թեմայից շեղվել է․ «Սա այլ քննարկման նյութ է»,- ասաց Անդրանիկ Քոչարյանը, ինչին հակադարձելով՝ Հայկ Սարգսյանը պնդեց, որ դա այլ թեմա չէ։

«Մեկ րոպե, և ավարտեք ձեր ելույթը»,- չզիջեց Քոչարյանը։ Սակայն Հայկ Սարգսյանը դարձյալ հետ չմնաց նրանից․ «Ոչ, պարոն Քոչարյան, ես կխոսեմ այնքան, ինչքան անհրաժեշտ կգտնեմ»: