Եվս մեկ անգամ ցույց տրվեց, թե փաշինյանական արտաքին քաղաքականությունը որքան տկար է և հակապետական սխալներով լեցուն․ Մամիջանյան (տեսանյութ)

«Եվս մեկ անգամ ցույց տրվեց, թե փաշինյանական արտաքին քաղաքականությունը որքան տկար է և հակապետական սխալներով լեցուն»: Այս մասին ԱԺ ճեպազրույցի ժամանակ ասաց «Պատիվ ունեմ» խմբակցության քարտուղար Հայկ Մամիջանյանը՝ անդրադառնալով Լուգանսկի ու Դոնեցկի ճանաչման մասին Հայաստանի դիրքորոշմանը։

Նրա խոսքով՝ վերջին երկու օրերին Ռուսաստանի Պետդումայի ու իշխանությունների գործողությունները ցույց տվեցին, թե ինչ էր պարտավոր անել Հայաստանի իշխանությունը պատերազմի օրերին՝ այն է ճանաչել Արցախի անկախությունը։

«Հիշեցնեմ, երբ 2016 թվականի ապրիլյան պատերազմի օրերին նախագահ Սարգսյանը հրավիրել էր ԵԱՀԿ անդամ երկրների դեսպաններին, այդ հանդիպման ժամանակ հստակ ասաց՝ եթե պատերազմը շարունակվի ևս մի քանի օր, ապա Հայաստանը կճանաչի Արցախի անկախությունը»,- ասաց Մամիջանյանը։

Նա հիշեցրեց, որ Ռուսաստանի նախագահն իր ելույթներում միշտ հիշատակում էր՝ անգամ Հայաստանը չի ճանաչել Արցախի անկախությունը։

«Տրամաբանությունից դուրս է, թե ինչու 44-օրյա պատերազմի ընթացքում Արցախի ճանաչում տեղի չի ունեցել։ Այնպես որ, այս ճանաչումը ես դիտարկում եմ երկու համատեքստում, ազգերի ինքնորոշման իրավունքի ևս մեկ ճանաչում միջազգային քաղաքականության մեջ։ Այն ևս մեկ անգամ փաստում է, որ Հայաստանի կապիտուլյանտ իշխանությունները, ի թիվս հակապետական այլ սխալների, գործել են մեծագույն սխալ՝ չճանաչելով Արցախի անկախությունը պատերազմի օրերին»,- ասաց ՀՀԿ-ական պատգամավորը։

Ինչ վերաբերում է Մոսկվայում Վլադիմիր Պուտինի ու Իլհամ Ալիևի միջև ստորագրված դաշնակցային համագործակցության վերաբերյալ հռչակագրի ստորագրմանը, ապա, Մամիջանյանի խոսքով, հնարավոր չէ նեղանալ դաշնակցից, որ ինքը չի անում ավելին, քան դու ինքդ պետք է անես։

«Ինձ շատ հետաքրքիր է, երբ է հետ կանչվելու Ռուսաստանում Հայաստանի դեսպանն ու փոխարինվելու։ Բայց նման բան տեղի չի ունենա, նորմալ երկրներում դա տեղի կունենար»,- ասաց նա։

Մամիջանյանի դիտարկմամբ՝ Հայաստանը շատ մեծ կորուստ ունեցավ այն առումով, որ չկարողացավ լինել Ռուսաստանի կանխատեսելի և վստահելի դաշնակիցը Հարավային Կովկասում։