Ախր միասնական էինք. ի՞նչ եղավ...

Բարև սիրելի հայրենակիցներ: Բարև ՀԱՅԵՐ: Ազգը ողբերգություն է ապրում. ամեն բան խառնվել է իրար: Այս մասին  ֆեյսբուքյան իր էջում գրել է Արցախի ռազմական-քաղաքական գործիչ Վահան Բադասյանը:

«Ամեն, ամեն բան. մատների վրա հաշված մարդիք են մնացել ազգիս մեջ, որ չեն տրվում այդ պրովոկացիոն քաոսին. ծանրակշիռ ձևով պայքարում են դրա դեմ. հույսները չկտրելով ապագա ունենալուց.փչանում են շատերն ու նաև փչացնում են շատերին: 

Oր օրի ուղղակի գահավիժման ձևով փչացման փոսի մեջ են հայտնվում մարդիք, ովքեր երեկ մտածող, պայքարող, հայրենասեր, հերոս տեսակ էին:

Ափսոսում եմ ուղղակի, էս ինչ զուլում է. տաղտկալի է, տաղտկալի:

Չեք պատկերացնում, թե ինչ սոսկալի է մեր ընդհանուր վիճակը:

Ամեն մարդ ունի լավ և վատ կողմեր:

Ազգիս երևելի ժամանակներում մենք մի կողմ էինք դնում մեր վատ կողմերը և իրար հետ մեր լավ կողմերով էինք շփվում, գործում,մեր լավ կողմերով էինք միասնաբար պայքարում ազգային ինքնորոշման, միացումի, հետո այլևս թշնամի դարձած թուրքի դեմ կռվում:

Ախր միասնական էինք: Բայց ի՞նչ եղավ:

Իսկ հիմա նույնը անում ենք մեր վատ կողմերով. Դեռ ավելին, փնտրում, թե չի լինում, հորինում ենք այդ վատ կողմերը ու որքան վատ,այնքան լավ: Որքան պառակտվենք, այնքան լավ, որքան իրար քարկոծենք,իրար փնովենք, իրար վատաբանենք, այնքան լավ: Իրար ու այլոց թալանչի, մարդասպան, դավաճան, թուրքի գործակալ...

Էհ հետո՞:

Այսօր մենք ապրում ենք մեր համար թերևս մինչև հիմա եղած ժամանակներից ամենադժբախտ օրերը:

Խնդրում և աղաչում եմ.

Մտածեք և ուշքի եկեք ՄԱՐԴԻՔ:

ՈՒշքի եկեք ՀԱՅԵՐ»: