«Մանկական Եվրատեսիլը» լավ առիթ է, որ տուրիստական հոսքերը կվերականգնվեն. Նիկոլ Փաշինյան (տեսանյութ)

Այս տարի մենք ընդունելու ենք բռնցքամարտի Եվրոպայի առաջնությունը և պետք է պատշաճ պատրաստվել: Այս մասին կառավարության այսօրվա նիստում ասաց Նիկոլ Փաշինյանը: 

«Չզեկուցվող հարցերի փաթեթում մենք գումար ենք հատկացնում մարզահամերգային համալիրին, որպեսզի պատրաստվի: Ուզում եմ հիշեցնել, որ Մարզահամերգային համալիրում ևս մեկ համաեվրոպական նշանակության միջոցառում ունենք, խոսքը «Մանկական Եվրատեսիլ»-ի մասին է: Ուզում եմ Էկոնոմիկայի նախարարության և տուրիզմի ոլորտի մեր գործընկերների ուշադրությունը հրավիրել այս միջոցառումների վրա, որը լավ առիթ է, որ մեր տուրիստական ոլորտի ընկերությունները ետկովիդյան շրջանում ակտիվանան և տուրիստական հոսքերը վերականգնենք»,- նշեց Փաշինյանը: 

Էկոնոմիկայի նախարար Վահան Քերոբյանն ավելացրեց ևս երկու կարևոր միջոցառում՝ մեկը ՄԱԿ World Tourism Organization-ի տարեկան համաժողովն է,  որն անցկացվելու հունիսի 1-3-ը Գյումրի Սև բերդում, մյուսը` Starmus միջազգային աստղագիտական համաժողովը, որն անցկացվելու է  սեպտեմբերին:

«Նոբելյան 6 մրցանակակիր այցելելու է Հայաստան, ինչպես նաև աշխատանքներ են տարվում, որ հունիսի երկրորդ տասնօրյակում Հայաստան գա Նոբելյան մրցանակակիր Արտեմ Փաթափությանը, որը էլի խոշոր միջոցառում է»,- ասաց Քերոբյանը: 

ԿԳՄՍ նախարար Վահրամ Դումանյանն էլ, իր խոսքով, բարձրաձայնեց շա՜տ մեծ նշանակության մի միջոցառման մասին՝ աշխարհի մաստշաբով. դա դպրոցականների միջազգային օլիմպիադան է՝ կենսաբանություն առարկայից, որը տեղի կունենա Երևանում:

«Շատ լավ, շատ կարևոր լրացում էր»,- ասաց Փաշինյանը: 

Դեմ ձայներ չկային, և կառավարությունն ընդունեց որոշում, ըստ որի՝ 77,7 մլն դրամ տրամադրեց Երևանում բռնցքամարտի Եվրոպայի առաջնության կազմակերպման համար: