Հովիկ Աբրահամյանը հրահանգել է վերահսկել անվերահսկելին

Այսօր գործադիրի այս տարվա վերջին նիստի ժամանակ վարչապետ Հովիկ Աբրահամյանը ՏՄՊՊՀ նախագահ Արտակ Շաբոյանին խիստ հանձնարարեց տոնական օրերին շուկան վերահսկել, ուժեղացնել վերահսկողությունը: Նշենք, որ Տնտեսական մրցակցության պաշտպանության պետական հանձնաժողովը շուկան վերահսկելու գործառույթ պարզապես չունի: ՏՄՊՊՀ-ի իրավասության ներքո են գտնվում՝ ձեռնարկատիրության զարգացման և սպառողների շահերի պաշտպանության նպատակով տնտեսական մրցակցության պաշտպանումը և խրախուսումը, բարեխիղճ մրցակցության համար անհրաժեշտ միջավայրի ապահովումը, հակամրցակցային գործունեության կանխարգելումը, սահմանափակումը և նախազգուշացումը, տնտեսական մրցակցության պաշտպանության նկատմամբ վերահսկողությունը:

Հավելենք, որ ՏՄՊՊՀ-ն հիմնականում գործում է խոշոր կենտրոնացված շուկաներում և գերիշխող դիրք ունեցող ընկերությունների գործունեության ֆիքսումը:

Օրերս ՏՄՊՊՀ նախագահ Արտակ Շաբոյանը նշել էր, որ խոշոր սուպերմարկետներին նախատոնական այս օրերին վերահսկողության տակ են պահում: Նա նաև նշել է, որ ամբողջ աշխարհում մրցակցության պաշտպանության մարմինները գների կարգավորմամբ ու վերահսկմամբ չեն զբաղվում, այդուհանդերձ, սակայն գնագոյացման խնդիրները գտնվում են ՏՄՊՊՀ-ի տեսադաշտում:

«Ամանորի նախաշեմին ուժեղացված հսկողություն ենք իրականացնում հատկապես այն շուկաներում, որտեղ գործունեություն են իրականացնում խոշոր ընկերությունները, գերիշխող դիրք զբաղեցնողները և հատկապես այն շուկաներում, որոնք սոցիալական նշանակություն ունեն»,- ասել էր Շաբոյանը:

Վերջին տվյալներով, ՏՄՊՊՀ-ն դաշտում որևէ խախտում չի հայտնաբերել: Նախատոնական շուկայի սննդային անվտանգության խնդիրները գտնվում են Գյուղատնտեսության նախարարության սննդի անվտանգության պետական ծառայության իրավասության ներքո. կառույցն անցել է ընդհատակ. մի կառույցը չի կարող դաշտը վերահսկել, մյուս կառույցը՝ ցանկություն չունի սննդի անվտանգությունը վերահսկել. ոչ գներն են վերահսկում, ոչ որակը: Իզուր չէ, որ նախատոնական և ոչ միայն նախատոնական սննդամթերքի գները, որակը բարձրանում է որտեղ ասես, ինչպես ասես. միևնույն է որևէ պատասխանատու չկա, կա միայն վարչապետ Հովիկ Աբրահամյանի հայտարարությունը: