«Օմիկրոն» շտամի դեպքում շնչուղիների և շնչառական համակարգի լուրջ ախտահարում է տեղի ունենում

Կորոնավիրուսի «օմիկրոն» շտամի տարբեր ենթատեսակների դեպքում հետևանքները տարբեր են։ Այս մասին ասուլիսի ժամանակ ասաց ՀՀ առողջապահության նախարարության հիվանդությունների վերահսկման և կանխարգելման ազգային կենտրոնի վարակիչ և ոչ վարակիչ հիվանդությունների համաճարակաբանության վարչության պետ Ռոմելլա Աբովյանը:

Նա նկատում է, որ օրինակ, «դելտա» շտամի դեպքում շուրջ 35 տոկոսի մոտ հետագայում կարող են առաջանալ տրոմբոզ, նյարդային համակարգի հետ կապված խնդիրներ։

«Դեռևս քննարկվում է, թե ինչ բարդություններ կարող են առաջանալ «օմիկրոնի» դեպքում։ Վերջին շրջանում նշվում էր, որ երեխաների մոտ հենց հիվանդության ընթացքում կարող են մաշկային տարբեր ցանավորումներ լինել»,- ասաց մասնագետը։

Նա տեղեկացրեց, որ կորոնավիրուսի «օմիկրոն» շտամի դեպքում շատ ավելի քիչ է ախտահարվում թոքային հյուսվածքը, սակայն կան բավականին այլ խնդիրներ, շնչուղիների և շնչառական համակարգի լուրջ ախտահարում է տեղի ունենում։

«Վաղ է խոսել «օմիկրոնի» թեթևության, բարդությունների կամ ծանրության մասին, քանի որ նոր ենք առնչվում դրա հետ, որոշ ժամանակ անց ավելի պարզ ու ակնհայտ կլինի, թե ինչի հետ գործ ունենք։ Արդեն ապացուցված է, որ կորոնավիրուսային հիվանդությունն անգամ ապաքինվելուց հետո բավական խնդիրներ կարող է առաջացնել»,- ասաց Ռոմելլա Աբովյանը։

Նա նշեց, որ հիվանդացության աճ գրանցվում է Հայաստանի բոլոր մարզերում, սակայն այն առավել բարձր է Երևանում: