Գուցե մարդիկ սկսեն ուշադրություն դարձնել, չհանդուրժեն այս լկտիությունը. Լևոն Քոչարյանը՝ Առուշանյանին աջակցելու մասին

Հաջակցություն Գորիսի համայնքապետ Առուշ Առուշանյանի՝ այսօր Վերաքննիչ քրեական դատարանի մոտ էր նաև Ռոբերտ Քոչարյանի որդին՝ Լևոն Քոչարյանը: Վերջինս դատարանից մեկ սպասելիք ունի՝ արդարադատություն, սակայն, միաժամանակ, նա կարծում է, որ տվյալ դատավորից նման բան չպետք է սպասել:

«Վերջին տարիների մեր դաժան փորձը ցույց տվեց, թե որոնք են այն դատավորները, որոնք խիզախություն ունեն արդարադատություն իրականացնել և ովքեր են, որ ենթարկվում են այս իշխանությունների ճնշումներին, ցանկություններին: Ուստի այսօրվա դատից սպասելիքներ չունեմ: Իսկ ինչ կապված է գալ այստեղ և մասնակցել այս ակցիային, իհարկե, պետք է: Նախևառաջ այդ մարդկանց համար, ովքեր փակված են, ովքեր չեն ընկճվել, չեն վախեցել, չեն ընկրկել, չեն կզել: Իրենք էլ պետք է զգան, որ մենակ չեն, մարդիկ իրենց մեջքին են, գնահատում են իրենց ու իրենց խիզախությունը»,- նշեց Քոչարյանը:

Վերջինս հույս հայտնեց, որ քաղաքացիներն այս ամենը տեսնելով՝ գուցե ուշադրություն սկսեն դարձնել, չհանդուրժեն այս լկտիությունը, որը կատարվում է: Ուղղակի արդեն բոլոր չափերն ու սահմաններն անցել են: 

«Առուշը լինելով բանտում՝ հաղթեց այս իշխանություններին: Ես չգիտեմ՝ աշխարհում եղե՞լ է նման դեպք: Գուցե եղել է, պետք է ուսումնասիրել ու հասկանալ»,- նշեց Քոչարյանը: