Ոչ մի հայ կին իր վրա չէր վերցնի պատասխանատվություն գտնվել մի վայրում, որը պարունակում է ռազմական գաղտնիք և ինչ-որ հրամաններ տար. Փոստանջյանը՝ Հակոբյանի մասին

Մեղքը մեր մեջ է, որ մենք չկարողացանք իրականացնել մեր ազգային ծրագրերը: Գեներալները, որոնք անցյալ տարի հայտարարություններ արեցին, ո՞ւր են այդ գեներալները: Գործից ազատվեցին, փախան, գնացին: Հիմա դատավորները... Ո՛չ, պետք է մնաք ձեր տեղում և պայքարեք, չհանդուրժեք: Այս մասին այսօր հայտարարեց «Երկիր Ծիրանի» կուսակցության նախագահ Զարուհի Փոստանջյանը մամուլի ասուլիսում: 

«Հիմա ես փաստաբանական գործունեություն եմ ծավալում և ես հիմա պայքարում եմ: Իմ ձեռքին եղած հնարավորությունները սա է՝ դիմել, հաղորդում ներկայացնել Նիկոլ Փաշինյանի դեմ: Ստանալ այսպիսի դատական ակտ, որը հետագայում կօգնի այլ դատավարությունների ընթացքում օգտագործելու: Բացի այդ, Մարդու իրավունքների եվրոպական դատարանի կողմից կան նախադեպեր, որի համար առաջին պաշտոնյան, ընդհակառակը, ամեն ձև պետք է քննադատության ենթարկվի և այդ քննադատությունը պետք է լինի այնպիսին, որ հասարակության կողմից ընկալումը լինի ցնցվող: Եվ այո, այդ քննադատությունը լինի ընդհուպ մինչև վիրավորական»,- նշեց Փոստանջյանը:

Փոստանջյանի խոսքով՝ կարևոր է, որ այդ քննադատությունը չհատի նրա անձնական կյանքը: Այսինքն՝ մենք նրա անձնական կյանքի հետ գործ չունենք: 

«Բայց այն, որ տիկին Աննան հավաքագրված է եղել... հագել էր, չէ՞, ռազմական հագուստ էր հագել, ինչ-որ «Էրատո» ջոկատ ուներ և այլն, մենք չունենք այդ հաշվետվությունները: Ի՞նչ էր անում այդ ջոկատը, ի՞նչ սխրագործություններ է կատարել: Բայց այն, որ ինքը գտնվել է ռազմական գաղտնիք պարունակող տարածքում և այնտեղ բարոյական աջակցություն է ցույց տվել, որն օրենքի մեջ չի տեղավորվում, հետևաբար մի անձի կողմից քննադատական ձևակերպումը տեղին էր և ճիշտ էր: Ոչ մի հայ կին, իր վրա իրապես չէր վերցնի պատասխանատվություն գտնվել մի վայրում, որը պարունակում է ռազմական գաղտնիք և ինչ-որ հրամաններ տար կամ ինչ-որ բարոյական աջակցություն ցույց տար: Սա անգամ պետք է քրեական հետապնդման առարկա դառնար»,- նշեց Փոստանջյանը: