Պուտինի և Մակրոնի միջև Ուկրաինայի հարցով գործարքներ չկան․ Պեսկով

Ռուսաստանի Դաշնության նախագահի մամուլի քարտուղար Դմիտրի Պեսկովը հերքել է The Financial Times թերթի այն տեղեկությունը, թե Վլադիմիր Պուտինն ու Էմանուել Մակրոնը Մոսկվայի բանակցություններում գործարք են կնքել Ուկրաինայի հարցով։

Interfax-ը հայտնում է, որ Կրեմլի ներկայացուցիչը լրագրողներին ասել է, որ The Financial Times-ը, իհարկե, սխալ է գրել. «Սա ըստ էության ճիշտ չէ, Մոսկվան և Փարիզը չեն կարողացել որևէ գործարք կնքել։ Դա ուղղակի անհնար է»,- ասել է Պեսկովը։

Նրա խոսքով՝ «Ֆրանսիան ԵՄ նախագահող երկիրն է, Ֆրանսիան ՆԱՏՕ-ի անդամ է, որտեղ Փարիզը ղեկավարություն չունի»։ «Այս դաշինքում ղեկավարությունը պատկանում է բոլորովին այլ երկրի, ի՞նչ գործարքների մասին կարող ենք խոսել»,- ասել է Կրեմլի խոսնակը՝ եզրակացնելով, որ «պարզապես թերթը սխալ է գրել»։

Ավելի վաղ FT-ն, հղում անելով աղբյուրներին, հայտնել էր, որ Պուտինն ու Մակրոնը գործարք են կնքել՝ նվազեցնելու լարվածությունը Ուկրաինայի շուրջ ստեղծված իրավիճակում։ Ռուսաստանի Դաշնության և Ֆրանսիայի նախագահները, մասնավորապես, իբր համաձայնել են, որ Ռուսաստանը նոր ռազմական նախաձեռնություն չի ձեռնարկի Ուկրաինայի հետ կապված։