Ալիևն ասում է՝ հայերը թունավորված են և նրանց թույնը գալիս է հիմնականում սփյուռքից. Արման Թաթոյան (տեսանյութ)

Ադրբեջանական պետական ատելությամբ քարոզչությունը հիմնված է երկու հիմնարար հենասյուների՝ կրոնական և էթնիկ պատկանելիությունների վրա: Ասուլիսում հայտնեց ՀՀ մարդու իրավունքների պաշտպան Արման Թաթոյանը՝ ներկայացնելով ադրբեջանական հայատյացության վերաբերյալ արտահերթ նոր զեկույց:

Նա վստահեցնում է` զեկույցը հիմնված է պատերազմից անմիջապես հետո մեր ամենօրյա մոնիթորինգային աշխատանքների վրա, ուսումնասիրությունները կատարվել են հենց ադրբեջաներեն բնօրինակներից և մասնագիտական սկզբունքով, զեկույցում ամեն ինչ հիմնված է օբյեկտիվ ապացույցների վրա:

Արման Թաթոյանը նկատում է, որ Ադրբեջանի իշխանությունների կողմից ատելության են արժանանում ոչ միայն Արցախի և Հայաստանի հետ կապված երևութները, այլև առհասարակ ողջ հայկականը:

«Ադրբեջանական իշխանությունները հատկապես թիրախավորում են սովորական մարդկանց, սա նշանակում է, որ այստեղ խոսքը ոչ այնքան մեր իշխանությունների քաղաքականության պետականության հանդեպ ատելության մասին է, այլ նաև մարդկանց են թիրախավորում»,- ասաց Արման Թաթոյանը:

ՄԻՊ-ն ընթերցեց ադրբեջանական հրապարակումներից մեկը, որում ասվում է. «Հայերը բարբարոս ազգ են, գերեզմաններից փորում, հանում էին մահացածների ոսկե ատամները, հալեցնում էին ու վաճառում»:

Արման Թաթոյանը նկատեց, որ Ադրբեջանում այնպիսի համեմամտություն են անում, որ հատուկ ատելություն առաջանա մարդկանց միջև և տեղեկացրեց, որ հայերին որակում են «շներ», «շակալներ», «հիվանդ հոգեբանություն ունեցողներ», «հրեշներ» և այլն:

Տեղեկացնելով, որ ՄԻՊ-ի գրասենյակը փորձել է պարզել, թե «շներ» հասկացության աղբյուրը որտեղից է՝ Թաթոյանն ասաց, որ բառի բացատրությունը գտել են 1919թ-ի Պապովի հատուկ բառարանում, որտեղ բացատրվում է, որ «գավուր» բառը, որը որպես անհավատ է օգտագործվել, նաև շուն անվանակոչելու համար է օգտագործվել և թուրք ժողովրդի կողմից վիրավորանք է բոլոր այն անձանց նկատմամբ, որոնք իրենց հավատքի չեն:

«Վերջերս նաև նոր ուղղություն է ակտիվ շրջանառվում, որը վերաբերում է սփյուռքի հետ մեր հարաբերություններին և Ադրբեջանի նախագահն էլ հատուկ երկու ելույթի ժամանակ ասել է, որ հայերը թունավորված են, և նրանց թույնը գալիս է հիմնականում սփյուռքից և, որ այդ հարցին նույնպես պետք է լուծում տրվի»,- ասաց Թաթոյանը:

ՄԻՊ-ի խոսքով՝ պատրաստված զեկույցը նաև այն մասին է, որ գոյություն ունի խոսքի և գործի ակնհայտ տարբերություն և եթե խոսքն Ադրբեջանի իշխանությունների խաղաղասիրության մասին է, ապա ակնհայտ է, որ կան կեղծ մտադրություններ և շղարշ արտաքին աշխարհի համար: