«Ինձ կոնկրետ ասել են` այս կենդանուն մի քննադատի, դու էլ հանգիստ կապրես, մենք էլ հանգիստ կապրենք». Սայաթ Շիրինյան (տեսանյութ)

ՀՀ ոստիկանության նախկին բարձրաստիճան սպա Սայաթ Շիրինյանը։ Սայաթ Շիրինյանը վստահեցնում է` իր նկատմամբ քաղաքական հետապնդում է իրականացվում։ Նա լրագրողների հետ զրույցում նկատում է, իրեն զգուշացրել են չքննադատել։

«Ինձ կոնկրետ ասել են` այս կենդանուն մի քննադատի, դու էլ հանգիստ կապրես, մենք էլ հանգիստ կապրենք»,- ասաց նա:

Նրա դիտարկմամբ խնդիրն այն է, որ նրանք էլ շատ լավ գիտակցում են` մոտ ժամանակներս այնուամենայնիվ որոշակի պրոցեսներ կսկսվեն և իշխանափոխության մեկնարկը կտրվի։

Սայաթ Շիրինյանը դրանով է բացատրում ստեղծված այն իրավիճակը, որ քաղաքական ակտիվ մասսային փորձում են գլխատել։

«Այսօրվա ուժային կառույցները դարձել են օրվա իշխանությունների բութ գործիքը. արժանապատվություն եւ ինքնասիրություն չկա: Եթե դու իսկապես մաքուր աշխատող ես` մի արա էդ պատվերը, հրաժարվի, ի՞նչ պետք է անեն քեզ, կախելու՞ են».-ասում է Շիրինյանը` նկատելով, որ իր գործով դատական նիստն ընթանում է Ոստիկանության մեկ ծառայողի ցուցմունքի հիման վրա:

«Ընդ որում, չի կարողանում մատնացույց անել` որտեղ է տեսել, ոչ մի արձանագրություն կազմված չէ, քննիչը 20-ից ավելի վկաների է հարցաքննել որևէ մեկն այդպիսի գրառում չի տեսել, բայց մի ոստիկանի ցուցմունքով գործը հասցրել են դատարան»,-ասաց Շիրինյանը։

Նա նկատեց նաև, որ սրճեփի գործով հարցաքննության ժամանակ Մարտունու բաժանմունքի պետը ասել է, թե գնա, ում դեմ ուզում ես բողոքի. «Ի՞նչ է` 99֊ականներն են, անպատի՞ժ եք մնալու` չէ՛, անպատիժ չեք մնա»:

Նա նաև իր խոսքը ուղղեց ԱՄՆ դեսպանին։

«Շատ կուզենայի ԱՄՆ դեսպանին տեսնել, երբ 2008 թվականին նույն ԱՄՆ դեսպանը, երբ մամուլի ասուլիսին իմ ձայնը մի փոքր բարձրացրի Ազատություն ռադիոկայանի լրագրողի նկատմամբ, ԱՄՆ դեսպանն անմիջապես բողոքի նոտա ուղարկեց Հանրապետության նախագահին։ Բա իմ ու իմ նմանների իրավունքները ոտնահարվում են, փռում են ասֆալտին, ամիսներով կալանքի տակ են պահում, վերջում պարզվում է՝ հանցակազմի բացակայության հիմքով գործը կարճվում է, դուք ասելիք չունե՞ք»։