Ինքն ընդհանրապես կապ չի ունեցել. Սիմոնյանը հերքում է, որ Վահագն Խաչատրյանին Խաչատուր Սուքիասյանն է առաջադրել

Ճիշտ չեն մամուլի այն հրապարակումները, ըստ որոնց Վահագն Խաչատրյանին ՀՀ նախագահի պաշտոնում առաջադրել է գործարար-պատգամավոր Խաչատուր Սուքիասյանը: Համենայն դեպս, այդպես է պնդում ՀՀ նախագահի լիազորությունները ստանձնած Ալեն Սիմոնյանը: 

«Ճիշտ չէ, ինքն ընդհանրապես կապ չի ունեցել: Ասեմ ավելին՝ որևիցե փուլում կապ չի ունեցել, պարոն Սուքիասյանը վարչության քննարկումներին չի մասնակցում և չի էլ կարող մասնակցել, որովհետև չի հանդիսանում վարչության անդամ: Քննարկումը տեղի է ունեցել առաջնայինը վարչության ֆորմատով, հետո՝ խմբակցության»,- ԱԺ-ում լրագրողների հետ զրույցում ասաց Սիմոնյանը: 

Նրա խոսքով՝ քննարկվել են նաև այլ թեկնածուների տարբերակներ, շատ երկար քննարկումներ են եղել:

«Տարբեր փաստարկներ են բերվել, և երկար քննարկումներից հետո այդ որոշումը կայացրինք: Ես անձամբ գտնում եմ, որ շատ լավ թեկնածու ենք ընտրել, որն իր անցած ճանապարհով, իր պարկեշտությամբ շատ համապատասխանում է և բավականին լավ կիրականացնի այն պարտականությունները, որոնք նախատեսվում են»,- ասաց Սիմոնյանը:

Հարցին, թե կոնկրետ ում կողմից է եղել Խաչատրյանի թեկնածության առաջադրումը, նա պատասխանեց, որ մի քանի հոգու կողմից է եղել: Ինչ վերաբերում է իր թեկնածությանը, ապա նա ասաց, որ ինքն ինքնաբացարկ է հայտնել: 

Նա ստույգ պատասխան չտվեց մամուլի այն հրապարակումներին, ըստ որոնց՝ հենց խմբակցության ներսում դեմ են եղել վարչապետի աշխատակազմի ղեկավար Արայիկ Հարությունյանի թեկնածությանը: Ընդհանրացնելով՝ Սիմոնյանը նշեց միայն, որ բոլոր թեկնածուներին էլ և կողմ, և դեմ մարդիկ են եղել, այդ թվում՝ և՛ իրեն, և՛ Վահագն Խաչատրյանին: Նշեց, որ եղել է 5-6 թեկնածու: