Ղարաբաղյան պատերազմը հունվարին կարող է սկսվել

«Ղարաբաղյան պատերազմը կարող է հունվարին սկսվել»,-այս վերնագրով հոդված է հրապարակել ռուսական հայտնի շաբաթաթերթերից մեկը: Այս մասին տեղեկացնում է ադրբեջանական oxu.az լրատվական կայքը` հղում անելով Аргументы Недели շաբաթաթերթին:

ՀԱՊԿ նիստի ընթացքում Հայաստանի նախագահ Սերժ Սարգսյանը հայտարարել է, որ Երևանի և Բաքվի միջև պատերազմը ամեն պահի կարող է սկսել: Նա հիշեցրել է նաև, որ կառույցին անդամագրված երկրների միջև կա ստորագրված համաձայնագիր, ըստ որի, կառույցի անդամ ցանկացած երկրի վրա հարձակման դեպքում մյուսները պետք է արձագանքեն:

«Այժմ Ղարաբաղյան հակամարտության լուծման երկու ծրագիր կա: Առաջինը առաջարկում են ԱՄՆ և Ֆրանսիան, որը նախատեսում է շփման գծում նորագույն սարքավորումների միջոցով հսկել կողմերի կատարած քայլերը և մեծացնել դիտորդների քանակը: Մենք հաշվել ենք սա և կարծում ենք անօգուտ կլինի: Դրա փոխարեն առաջարկում ենք շփման գծում տեղակայել խաղաղապահ ուժեր, սակայն Ադրբեջանը կտրականապես դեմ է»,- ասել է մի ռուս ռազմաքաղաքական գործիչ, ում անունը թերթը չի նշում:

Նույն աղբյուրը նշում է նաև, որ հակամարտությանը արդեն պետք է վերաբերվել շատ լուրջ, քանի որ ռուսական ինքնթիռի խոցումից հետո Ադրբեջանը պաշտպանեց Թուրքիային, ինչը Հարավային Կովկասում իրադրությունը շրջեց ի օգուտ Անկարայի և Վաշինգթոնի:

Աղբյուրը հիշեցնում է, որ պատահական չէ Հայաստանում ռուսական ռազմաբազայի վերազինումն ու համալրումը նոր տեխնիկայով: Միայն դեկտեմբեր ամսին Հայաստանի ռուսական ռազմաբազա է տեղափոխվել մեծ թվով ռազմաօդային տեխնիկա: