Ազգը մեծ հույսեր է կապում մեր հետ. կարծում եմ վարչապետը վերջակետը դրել է էս հարցի. Քերոբյանը` իր հրաժարականի մասին

«Ազգն ընտրել է «Քաղաքացիական պայմանագիր» կուսակցությանը, ՔՊ-ն ընտրել է վարչապետին, վարչապետն ընտրել է իր նախարարներին։ Բնականաբար, ազգն այն մարդկանց հետ է, որոնք զբաղեցնում են այս պաշտոնները, ունի մեծ հույսեր, և չափազանց անպատասխանատու է առաջին իսկ հարմար առիթով գնալ»:

Այս տեսակետը հայտնեց Էկոնոմիկայի նախարար Վահան Քերոբյանը` կառավարության նիստից հետո, լրագրողների հետ զրույցում` պատասխանելով իր հրաժարականի հետ կապված հարցին։

«Իմ կարծիքով վարչապետը վերջակետը դրել է էս հարցի»,-ասաց նա:

Նախարարի խոսքով՝ ցանկացած փոփոխություն ժամանակ է պահանջում, և երբ ինչ-որ մեկը պետական կարևոր պաշտոններ է զբաղեցնում, պետք է հասկանա, որ ինքը չունի այդ ազատությունը՝ երբ ուզի, գնա:

«Ազգը մեծ հույսեր է կապում»,-ասաց նա:

Պատասխանելով հարցին, թե վարչապետը ճի՞շտ էր ասում, որ ինքը թույլ չի տվել նախարարին հրաժարական տալ՝ Քերոբյանն ասաց․ «Ես չասացի, որ ուզել եմ հրաժարական տալ, շատ մեծ պատասխանատվությամբ եմ արել այդ խոստումները և ժամանակ առ ժամանակ մենք քննարկումներ ունենում ենք մեր ղեկավարների հետ՝ կատարված աշխատանքի որակի և բավարար լինելու վերաբերյալ։ Ես կարող եմ ասել՝ իսկ ի՞նչ կարծիքի եք սրա մասին, ինքը կարող է ասել՝ ես արգելում եմ։ Դա չի նշանակում, որ ես ուզում եմ հրաժարական տալ»,-ասաց Վահան Քերոբյանը: