Ինչո՞ւ է լռում Սայաթ Շիրինյանը․ միգուցե սրճեփը գողացել է վարչապետի աթոռը զբաղեցնո՞ղը. Արիանա Հովսեփյան

Երեկ, սյունյաց ողջույնների տեսակին համահունչ բերման ենթարկվեց ոստիկանության գնդապետ Սայաթ Շիրինյանը:

Նա մեղադրվում էր անցյալ տարի օգոստոս ամսին Մարտունի քաղաքում ՍՐՃԵՓ գողանալու մեջ:

Սայաթ Շիրինյանը հերքել էր իր մասնակցությունը «դարի գողությանը»՝ հիմնավորելով, որ 1997թ-ից այն կողմ Մարտունի քաղաքում չի եղել:

Այս բարդ քրեական գործի մեջ սակայն կա մի մանրուք, որ ոչ ոք չի նկատում․ Սայաթ Շիրինյանը, լինելով պրոֆեսիոնալ ոստիկան, մինիմում անալիտիկայի մակարդակով, առերևույթ պետք է որ տեղյակ լիներ, թե ով կարող էր գողանալ ՍՐՃԵՓԸ և հայտնել այդ մասին նախաքննությանը, որը չի արել, չի օգնել իր նախկին կոլեգաներին:

Այսպես՝

Ըստ նախաքննության տրամաբանության, անձը 1997թ-ից Մարտունիում չլինելով, կարող է այնտեղից 2021թ-ին ՍՐՃԵՓ գողանալ:

Նույն տրամաբանությունը շարունակելու դեպքում, անձը որը 2021-ին եղել է Մարտունիում, միանշանակ կարող է ներգրավվել ՍՐՃԵՓ գողացողների կասկածյալների ցանկում: Առավել ևս, եթե այդ անձը նախկինում եղել է դատապարտված զանգվածային անկարգություններ կազմակերպելու մեջ, որն ուղեկցվել է խանութներ թալանելով:

Վստահ եմ, որ Սայաթ Շիրինյանը հստակ գիտի, որ վարչապետի աթոռը զբաղեցնող անձը 2021թ-ին եղել է Մարտունիում, դատապարտված է եղել զանգվածային անկարգություններ կազմակերպելու մեջ, որը ուղեկցվել է խանութներից գողություններ անելով:

Այս համատեքստում, թե ինչով է պայմանավորված Սայաթ Շիրինյանի լռությունը՝ անհասկանալի է: Կարծում եմ՝ նա իր երկարատև փորձով կարող էր նույնականացնել ՍՐՃԵՓ գողացող անձին և հավաստի կասկածի մակարդակով կարծիք հայտնել, որ ՍՐՃԵՓԸ կարող էր գողանալ 2021թ-ին Մարտունի այցելած վարչապետի աթոռը զբաղեցնող անձը, իսկ մնացածը թող քննությունը կամ հերքեր կամ հաստատեր:

Կարծում եմ, մոտ օրերս կստանանք նաև այդ հարցի պատասխանը:

Արիանա (Արմենուհի) Հովսեփյան