Շարմազանովը խոսում է, որ ի՞նչ անի

Էդուարդ Շարմազանով` ՀՀԿ խոսնակ, ԱԺ փոխնախագահ: Չի ծառայել ՀՀ զինված ուժերում , 2006թվ պարգևատրվել է ՀՀ ՊՆ-ի «Գարեգին Նժդեհ», 2008 թվ «Անդրանիկ Օզանյան» և այլ շքանշաններով: ՀՀԿ շարքերում Է. Շ- ը միակը չէ, որ չի ծառայել հայոց բանակում: Կարեն Ավագյան , Տարոն Մարգարյան, Արմեն Աշոտյան, Սամվել Ֆարմանյան, Մհեր Սեդրակյան, Սամվել Նիկոյան, Մկրտիչ Մինասյան, պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյան` Սամվել Ալեքսանյանի ազգակիցը, և ուրիշ այլ ՀՀԿ-ականներ ևս չեն ծառայել բանակում: Բայց նրանք բոլորն էլ տարբեր ժամանակներում ստացել են տարբեր պարգևներ, «Անդրանիկ Օզանյանից մինչև ՀՀ զինված ուժեր . 20 տարի» հոբելյանական մեդալներ: Նրանք բոլորն էլ այսօր և պաշտոն, և փող ունեն:

Այս անունները հիշատակման արժանի չէին լինի, եթե ՀՀԿ խոսնակ Է. Շարմազանովը, ով սահմանի մասին իրական պատկերացում չունենալով` չասեր, թե սահմանին մեր զոհերը անկախության գինն են: Տարիներ շարունակ մեր ժողովուրդը անկախության գինը տվել է տառապանքով, ընչաքաղցությամբ, ՀՀԿ-ի վարած ապաշնորհ քաղաքականության շնորհիվ` լայնածավալ արտագաղթով: Միայն 2008-2014 թթ Հայաստանից արտագաղթել է 232.000 մարդ:

Տարիներ շարունակ անկախության գինը ՀՀԿ-ի շնորհիվ իր ուսերին է վերցրել սոցիալապես ծանր վիճակում հայտնված ընտանիքն ու իր զավակը, իսկ անկախության վայելքն իրենց ձեռքում են պահում Է . Շ.-ը ու իր թիմակիցները:

Տարիներ շարունակ անկախության գինը տվողը չի կարողանում իր մեջքը ուղղել, իսկ անկախություն վայելողները հասցրել են անգամ իրենց դեռ չծնված երեխաների ու թոռների մեջքն ուղղել: Անկախության արժեքը գիտակցող, սահմանին վիրավորված զինվորը այսօր բարեգութ մարդկանց օգնությունն է խնդրում `ապրելու համար, իսկ անկախության գինը վայելող Շարմազանովն ու իր նմանները դիզելով են զբաղված: Անկախության գինն իրենց մեջ կրելով, այսօրվա պատերազմական վիճակում թուրքի հետ կռիվ տալով` աղքատ ընտանիքի երեխաները զորացրվում ու արտագնա աշխատանքի են մեկնում, իսկ անկախությունն իրենցով արածները ամեն օր պաշտոնակռիվ են անում, ընտրություն կեղծում, երկրի ընդերքն ու փողերը մսխում:

Սա է անկախության գինը շարմազանովների ու սահմանը պահող զինվորի ու իր ընտանիքի համար: Պատմաբան Է.Շ. գոնե պետք է լավ իմանա, որ օրինակ երկրներ կան, որտեղ իր նմանները, ովքեր չեն ծառայել բանակում, ոչ միայն պետական ծառայող չեն կարող լինել, այլև որևէ պաշտոն զբաղեցնել: Լավագույնը, որ կարող են անել դա այն է, որով անկախության նվաճման տարիներին զբաղվում էր մեկ այլ ՀՀԿ-ական Սամվել Ալեքսանյանը, ով ի դեպ, նախագահական նստավայրում բոլորովին վերջերս պարգևատրվեց «Հայրենիքին մատուցած ծառայության համար» մեդալով: Դա ճիշտ այն օրն էր, երբ Տավուշի մարզում հակառակորդի կրակոցից երեք խաղաղ բնակիչ զոհվեց:

Սա է անկախության գինը, հիմա արդեն մի տեսակ վտանգավոր գինը:

Ժամանակին այս անկախության գինն իր ուսերին տարած Սպարապետն ասում էր. «Մենք` այս պետության պատասխանատուներս չպետք է թույլ տանք, որ անկախությունը, ազատությունը, հաղթանակը ժողովրդի համար դառնան սովորական գաղափարներ: Մենք կկործանվենք, եթե ժողովուրդը սկսի ատել այս գաղափարները»: