Հնարավո՞ր է հանրային տրանսպորտում էլ պատվաստման QR կոդ պահանջեն. ԱՆ փոխնախարարի մեկնաբանությունը (տեսանյութ)

Մի քանի օրից ուժի մեջ է մտնում QR կոդի պահանջը մի շարք վայրերում: Որևէ ազդեցություն գնահատում արվե՞լ է, թե դա ինչպիսի ազդեցություն կունենա տնտեսության, բիզնեսի վրա և ինչո՞վ է պայմանավորված այն, որ դա հենց հիմա է արվում՝ հաշվի առնելով հանգամանքը, որ կորոնավիրուսի հիվանդացության թվերը նվազել են: Նման հարցադրումներով հանդես եկավ ԱԺ «Հայաստան» խմբակցության պատգամավոր Արթուր Ղազինյանը՝ դրանք ուղղելով ԱՆ փոխնախարար Լենա Նանուշյանին:

Պատասխանելով՝ Նանուշյանը ցավով արձանագրեց, որ նվազ թվերն այլևս չեն պահպանվում, և մեծ արագությամբ աճ է նկատվում, ինչպես Հայաստանում, տարածաշրջանում, այնպես էլ եվրոպական երկրներում՝ կապված կորոնավիրուսային նոր շտամի հետ, որը շատ ավելի արագ է տարածվում: 

«Կարծում ենք, որ այս կարգավորումը ժամանակին է, և այն նպաստելու է քաղաքացիների շրջանում ոչ միայն պատվաստումների ընդհանուր թվաքանակի բարձրացմանը, այլև նպաստելու է ավելի անվտանգ միջավայր ունենալու այն վայրերում, որոնք նշված են նախարարի հրամանում: Ինչ վերաբերում է տնտեսական գնահատականին, ապա մենք տեսնում ենք, որ կորոնավիրուսային հիվանդության տարածումը բոլոր երկրիների տնտեսության վրա ինչպիսի բացասական ազդեցություն է ունենում»:

Արձագանքելով՝ Ղազինյանն արձանագրեց, որ դեռևս չի հանդիպել փաստական հաստատված տվյալների այն մասին, որ մարդիկ, ովքեր ունեն պատվաստում, չեն վարակվում: Նրա հարցը, սակայն, հանրային տրասնպորտին էր վերաբերում:

«Մարդկային կուտակումները շատ ավելի մեծ ու վտանգավոր են հանրային տրանսպորտում: Ցանկի մեջ չկա հանրային տրանսպորտը, որ պետք է մուտք գործեն պատվաստված մարդիկ: Բոլորս ենք տեսել, որ թե՛ Երևանի, թե՛ միջմարզային տրասնպորտում ինչպիսի կուտակում է»,- ասաց Ղազինյանն ու հետաքրքրվեց, թե որն է տրամաբանությունը QR կոդի պահանջ սահմանել, ասենք, սրճարանում, որտեղ սեղաններն իրարից հեռու են շարված և չսահմանել հանրային տրանսպորտում, որտեղ մարդիկ գլուխ գլխի են: 

Նանուշյանը պատասխանեց, որ կառավարությունն ու Առողջապահության նախարարությունն իրականացնում են աստիճանական քայլեր՝ հակազդելու այս պանդեմիայի տարածմանը մեր երկրում:

«Այդ շրջանակներում մենք աստիճաբանար ենք սահմանում կարգավորումները, որպեսզի  մի կողմից պաշտպանենք ավելի շատ բնակչության առողջությունը, մյուս կողմից՝ մեծ ազդեցություն չուենանք տնտեսության զարգացմանը»:

Ինչ վերաբերում է վարակելիությանը, ապա նա շեշտեց, որ պատվաստման առկայությունը անձի մոտ բավականին նվազեցնում է վարակման հավանականությունը: Նա նշեց, որ նոր շտամերի ի հայտ գալու հետ կապված պատվաստման արդյունավետությունն, իհարկե, նվազում է, բայց այն միևնույնն է՝ գործում է, այսինքն՝ այն մարդիկ, ովքեր պատվաստված են, ավելի քիչ են վարակվում, քան այն մարդիկ, ովքեր պատվաստված չեն: 

Խոսելով հանրային տրանսպորտի մասին՝ փոխնախարարը կրկնեց, որ կարգավորումներն աստիճանաբար են իրականացվում և դրանք անընդհատ քննարկման մեջ են. «Մենք գնահատում ենք, որ հանրային տրանսպորտից օգտվող մարդիկ հիմնականում նրանք են, ովքեր գնում են աշխատանքի, կա՛մ մասնակցելու մշակութային կյանքին, կա՛մ այցելում են հանրային սննդի վայրեր և եթե այդ վայրերում սահմանում ենք կարգավորումներ, ապա հանրային տրանսպորտի անվտանգության հարցը, ինչպես նաև դիմակի կրման պարտադիր պահանջը նպաստում է նվազեցնելու վարակի տարածման ռիսկը»,- եզրափակեց Նանուշյանը: 

Մանրամասները՝ տեսանյութում