Ի՞նչ կարգավիճակ ունի Ռուբեն Ռուբինյանը․ Գեղամ Մանուկյանը մի շարք հարցեր է ուղղել (տեսանյութ)

Տպավորություն կա, որ Ազգային ժողովի փոխնախագահ Ռուբեն Ռուբինյանին օժտել են անձեռնմխելիության ևս մեկ շերտով. հանկարծ Ռուբեն Ռուբինյանին չքննադատեք,  որովհետև ինքը բանագնացն է: Բանագնացն ինչպես է նշանակվել՝ չպետք է քննադատել, ինչ օրակարգով է բանակցություններ վարում՝ չպետք է քննադատել, ինչ իրավական կարգավորումներով է նշանակվել՝ չպետք է քննադատել: Այս մասին այսօր Ազգային ժողովում ասաց «Հայաստան» խմբակցության պատգամավոր Գեղամ Մանուկյանը:

«Հիմա Ռուբեն Ռուբինյանի և Սերդար Քըլըչի առաջին օրերի գործունեությունը: Հիմա քննադատելո՞վ է, որ Ռուբեն Ռուբինյանն անպաշտպան է դառնում բանակցություններին, թե՞՝ որ Սերդար Քըլըչը մինչ հանդիպումը հանդիպում է ունենում Թուրքիայի պաշտպանության նախարարի հետ: Եվ այդ հանդիպման փաստով է ներկայանում Հայաստանի ներկայացուցչի հետ բանակցություններին»,- ասաց Մանուկյանը: 

Նա նշեց, որ Ռուբեն Ռուբինյանն անձնապես չի քննադատվում, թեպետ անձնապես էլ կարող էր քննադատվել հենց երեկվա ամբողջ օրվա դրվագով:

«Պարոն Ռուբինյան, այսպիսի թույլ ներվային համակարգով ինչպե՞ս կարելի է նման դժվարին բանակցային պրոցեսում Հայաստանը ներկայացնել: Բայց քննադատվում է այն բոլոր գործողությունները, որի արդյունքում Հայաստանի Հանարապետությունը Թուրքիայի հետ բանակցություներում ներկայացնում է ԱԺ փոխնախահահ Ռուբեն Ռուբինյանը: Ի՞նչ կարգավիճակ ունի Ռուբեն Ռուբինյանը: Մինչև հիմա չկա որևէ հստակ կարգավիճակ, բացի ԱԳՆ մամուլի քարտուղարի հայտարարությունից: Իրավական որևէ կարգավորումով՝ հրամանագիր, որոշում, կարգադրություն կա՞՝ չկա: Ի՞նչ լիազորություններով է Ռուբեն Ռուբինյանը ներկայացնում ՀՀ-ն Թուրքայի հետ բանակցություններում»,- հարցեր ուղղեց պատգամավորը:

Մանրամասներն ու շարունակությունը՝ տեսանյութում