Այս իշխանությունը կա՛մ չի գնահատել Հայաստանի համար ստեղծվող նոր սպառնալիքները, կա՛մ գիտակցաբար գնում է նոր կորուստների, զիջումների, որի գինը վճարելու է յուրաքանչյուր քաղաքացի

Եթե ՀՀ ԶՈւ-ում բարեփոխումները, մարտունակության բարձրացմանն ուղղված միջոցառումներ մշակող ու իրականացնող մարդիկ նորմալ լինեն` նույնիսկ 2017 թվականի բյուջեով կարելի էր ստեղծել համակարգ, որը ՀՀ-ի և ԱՀ-ի համար կարող էր ապահովել նվազագույն խնդիրները: Այս մասին այսօր ԱԺ-ում լրագրողների հետ զրույցում ասաց «Պատիվ ունեմ» խմբակցության պատգամավոր Տիգրան Աբրահամյանը:

«Այսինքն՝ այստեղ միայն բյուջեի խնդիր չէ, այլ այն է, որ երկիրը ղեկավարում են մարդիկ, որոնք նպատակային ձևով Զինված ուժերը տանում են կազմալուծման։

Ռազմաքաղաքական իշխանության բուրգի վերևում ներկայացված են անձինք, որոնք նույնիսկ ցանկության դեպքում ի վիճակի չեն Հայաստանը դուրս բերել այս վիճակից»,- ասաց Տիգրան Աբրահամյանը:

Անդրադառնալով սահմանային խնդրին` նա նշեց, որ իշխանությունների կողմից՝ զորքերի հայելային հետքաշման հայտարարությունները որևէ տրամաբանություն չունեն:

«Պատկերացրեք իրավիճակ, որ ևս 3 կմ պայմանական հետ ենք քաշվում: Հետ ենք քաշվում մեծ թվով բնակավայրերից, կոմունիկացիաներից, որոնք ստանում են, օրինակ, չեզոք գոտու կարգավիճակ: Իսկ ո՞վ է վերահսկելու ադրբեջանական հաջորդ ագրեսիան:

Մինչև ո՞ւր ենք հետ քաշվում: Ո՞ւր է տրամաբանությունը: Եթե համարում ենք, որ Ադրբեջանը գտնվում է մեր սուվերեն տարածքում, ո՞րն է իմաստը, որ մենք մեր հատվածում 3 կմ զիջենք ու հետքայլ կատարենք: Իրականության մեջ որևէ տրամաբանություն չունի»,- ասաց ընդդիմադիր պատգամավորը` հավելելով, որ այս ընթացքում ադրբեջանական զորքերը տարբեր օպերացիաների, հարձակումների, ագրեսիայի հետևանքով անարգել ելումուտ են անում Հայաստանի սուվերեն տարածքում:

Ըստ նրա՝ իշխանությունը փորձում է ցույց տալ, թե ջանքեր է գործադրում իրավիճակը շտկելու համար, բայց գլորում է շատ ավելի վատ վիճակի մեջ:

«Այս իշխանությունը կա՛մ չի գնահատել դրանից բխող Հայաստանի համար ստեղծվող նոր սպառնալիքները, կա՛մ, շատ ավելի հավանական է, որ գիտակցաբար գնում է նոր կորուստների, զիջումների, որի գինը վճարելու է Հայաստանի յուրաքանչյուր քաղաքացին անկախ նրանից, թե որտեղ է ապրում»,- ասաց Աբրահամյանը: