Հայ հասարակության ուղեղներն այնպես են լվացած եղել, աչքերն այնպես են փակել, այնպես են կուրացրել. հանրությանը պետք է բերել մի իրավիճակի, որ նա սկսի լսել. Զաքարյան

Ընդդիմությունն իներտ վիճակում չէ: Հենց միայն այն հանգամանքը, որ ամեն օր ընդդդիմադիր դաշտից ոչ միայն քննադատություններ, այլ նաև ալտերնատիվներ են առաջարկվում և խոսվում է վտանգների մասին: Մենք ո՞ւմ համար ենք խոսում՝ հայ հասարակության համար ենք խոսում: Այս մասին այսօր մամուլի ասուլիսում ասաց Պաշտպանության նախկին փոխնախարար Արտակ Զաքարյանը: 

«Հայ հասարակության ուղեղներն այնպես են լվացած եղել, հայ հասարակության աչքերն այնպես են փակել, այնպես են կուրացրել, այնպես են թշնամացրել, այնպես են խորացրել նախկին-ներկա հիմար տարանջատումով»,- ասաց Զաքարյանը: 

Դիտարկմանը, թե, օրինակ, ՔՊ-ական պատգամավոր Խաչատուր Սուքիասյանն ասում է, որ Զաքարյանի քաղաքական ուժն իշխանություն ունենալու տարիներին թալանել է, նա պատասխանեց. «Ի՞նչն ենք թալանել: Թալանել ենք՝ դատարանն էլ է իրենցը, դատախազն էլ է իրենցը, թող թալանչիներին բերեն, ապացուցեն, թալանն էլ վերադարձնեն, ծառայեցնեն հանրային կարիքների համար: Ի՞նչ են հիմար-հիմար խոսում: Իրենց պետք է, որ իրենք ասեն՝ թալան, մենք ասենք՝ թալանչին դու ես, ու մենք դոփենք տեղում»,- ասաց բանախոսը:

Ըստ նրա՝ մեր հանրությանը պետք է բերել մի իրավիճակի, որ նա սկսի լսել:

«Հանրության արդեն հոգնեցրել են նախկին, ներկա, «թալանչին դու ես», «չէ, դու ես» զրույցները: Իշխանությունը շահարկում է սրանք, որովհետև ցանկանում է ընդդիմությանը քաշել իր դաշտ, որ ինքն ասի՝ թալանչի եք, ընդդիմությունն ասի՝ չէ, դուք եք ու ապացուցի: Խնդիրը հետևյալն է՝ մենք մեր ամբողջ ազգով, ամբողջ՝ 10 մլն հայությամբ, կանգնած ենք լուրջ գոյաբանական խնդրի առջև: Առաջին մասը՝ պետությանը սպառնացող վտանգն է՝ Աստված մի արասցե կորցրեցինք պետականությունը, այսինքն՝ նրա կազմակերպական հնարավորությունը, առաջին հերթին՝ անվտանգային կազմակերպական հնարավորությունները և հանրային ռեսուրսները ճիշտ բաշխելու հնարավորությունը, երկրորդ սպառնալիքը հայ հանրությանն է: Վերջ»,- ասաց Զաքարյանը: