«Ըսել են` գնա տունդ պառկի, մենք էլ բան չենք կըրնա անենք». հիվանդ ու միայնակ ապրող կնոջը բուժաշխատողները ուղարկել են տուն` չջեռուցվող փլատակներ (տեսանյութ)

Գյումրիում բնակվող այս կնոջ անունը Արմինե է։ Նա գոյատևում է անմարդկային պայմաններում, անբուժելի հիվանդ է, ունի հարազատներ՝ երեք քույր, մեկ եղբայր ու երկու երեխա, տղա ու աղջիկ, որոնք հասուն մարդիկ են հիմա ու մեծացել են իրենց հոր մոտ, որից Արմինեն բաժանվել է, երբ երեխաները շատ փոքր էին:

Թե ինչպես է ստացվել, որ Արմինեին բոլորը լքել են` երկար պատմություն է, փաստն այն է, որ այսօր նա օգնության կարիք ունի:

Արմինեն պատմում է, որ Շտապօգնության աշխատակիցները նրան տեղափոխել են հիվանդանոց, սակայն այնտեղից նշանակումներ են արել ու տուն ուղարկել։

Գյումրեցի կինը բուժաշխատողների խոսքն է փոխանցում. «Ըսել են` գնա տունդ պառկի, օգուտ չունի օր ըստեղ եկար, պառկար, մենք էլ բան չենք կըրնա անենք»:

Ասում է կինն ու նկատում, որ արդեն մի քանի անգամ իրեն այդպես տարել ու հետ են բերել։

«Շիրակ կենտրոն» հ/կ նախագահ Վահան Թումասյանը, անդրադառնալով խնդրին, հրապարակել է տեսանյութ և կից գրել.

«Գյումրի, ուր մարդը կոպեկի արժեք չունի...

Անբուժելի հիվանդ կնոջը բառիս բուն իմաստով նետել են փողոցը, 23 աստիճան ցուրտ եղանակին, չջեռուցվող մի փլատակում մահանալու... Ահա երկրի դեմքը:

Հ.Գ. Անցած օրն էի գրել այս մասին....

Ցրտահարության շեմին է...

Գյումրու նախկին ռադիոզավոդի կիսաքանդ հանրակացարանի երկրորդ հարկում մի հիվանդ միայնակ կին ցրտահարության շեմին է: Քայլել չի կարող, վառարանը շարքից դուրս է եկած, մեր տրամադրած վառելափայտն էլ վերջացել է: Հարևանները լացակումած զանգել օգնություն էին աղերսում:

Մի նորմալ վառարան, մի քանի պարկ վառելփայտ և սննդամթերք է պետք:

Ամբողջ քաղաքում հուսամ մի մարդ կգտնվի, որ գնա օգնի:

Մենք հիմա գյուղերում ենք, վաղը միայն կարող ենք նրան այցելել»: