«Ձեզ էլ են սպանել, մնացածին էլ են սպանել, հրեաների ցեղասպանություն էլ է եղել, բայց նրանք այսօր հաշտ ապրում են. Խաչատուր Սուքիասյան (տեսանյութ)

Վերջ տվեք, էս ձևով մենք իրար հետ չենք շփվելու։ Այսպես արձագանքեց ՔՊ֊ական պատգամավոր, հայտնի գործարար Խաչատուր Սուքիասյանը լրագրողների հարցին, երբ վերջիններս հերտաքրքրվեցին, թե ինչպես է պատրաստվում հաշտվել մի ազգի հետ, որը կեղեքել ու սպանել է հայերին։

«Ձեզ սպանել են. ձեզ էլ են սպանել, մնացածին էլ են սպանել, անգլացիները` ֆրանսիացիներին, ֆրանսիացիներն էլ նրանց, գերմանացիներն էլ դրանք, հրեաների ցեղասպանություն է եղել, բայց նրանք այսօր Գերմանիայում հաշտ ապրում են»,-ասաց Սուքիասյանը:

Ըստ նրա այն գործընթացները, հայտարարությունները և իրողությունները, որոնք կարող են տարածաշրջանում և միջազգային հարթակներում լինել, շատ ժամանակ մեզանից կախված չի լինում:

«Այն ձգտող երկրները, որոնք ուզում են «թուրան» կամ այլ միավորումներ կառուցել, սակայն հնարավոր է, որ իրենցից ավելի հզոր այլ երկրները, այլ գործիքներ օգտագործելով, ձախողեն միություններ ստեղծելու ցանկություն ունեցող երկրների պլանները։ Դրա համար մենք պետք է խելացի լինենք, ամեն ինչի մեջ ինքներս չգնանք, չմասանակցենք, դա մեր գործը չէ։ Մեր գործը մեր հարևանների հետ ուղղակի հարաբերությունները հստակեցնելն է։ Կարծում եմ, որ մեր հարևան Ադրբեջանի հետ հնարավոր է՝ ունենանք հարևանական հարաբերություններ»,-ասաց ՔՊ֊ական պատգամավորը:

Հարցին, թե իսկ ինչ է ուզում ինքը` Սուքիասյանը պատասխանեց, որ իր
ուզածը սերունդների բարեկեցիկ կյանքն է. «Դրա համար ֆորմուլաներ կան՝ իրողության ֆորմուլաները, ոչ թե պետք է գնամ մի զարգացած երկրի ֆորմուլա բերեմ ու ասեմ, թե սա պետք է լինի: Տարածաշրջանում պետք է գիտակից լինենք, մենք պետք է մեր հարևաններին հարգենք, նրանք՝ մեր իրավունքները, մենք՝ նրանց իրավունքները»,- ասաց ՔՊ-ական պատգամավորը: