Ձմեռ պապն էլ հանրապետականացավ

Այն որ ՀՀԿ-ն հանրապետությունում փորձում է ամեն ինչ իրենով անել` դա այլևս անվիճելի է,  բայց որ Հայաստանում Ձմեռ պապն էլ է աստիճանաբար հանրապետականացվում, սա կուսակցության տարեվերջյան անակնկալն էր: Երևանի թիվ 38 մանկապարտեզի ամանորյա միջոցառման Ձմեռ պապը հանրապետական Արմեն Աշոտյանն է եղել, ով Ձմեռ պապիկի հագուստով մտել է դահլիճ և նվերներ բաժանել մանկապարտեզի սաներին:

Օրեր առաջ էլ Արմեն Աշոտյանը փորձեց Ձմեռ պապիկի թոռնիկի դեր խաղալ ու հեքիաթի պապիկին մի ծավալուն նամակ գրեց, հիշեցնելով, որ ժամանակին ինքն ու Ձմեռ պապը իրար խաբել են, բայց գոհ են մնացել, հետո մեծացել, դախացել, սեռահասունացել ու լրջացել են: Ըստ երևույթին, Ձմեռ պապը այնքան էլ լավ չի ընդունել ՀՀԿ-ական թոռնիկի նամակը` հասկանալով որ գործ ունի մի իրականության հետ, որտեղ մարդիկ, ինչպես կասի Աշոտյանը, «լպրծուն ու արյունախում են, ոչ հիշողութուն, ոչ հիշատակ, ու ոչ էլ խիղճ ունեն»:

Հաջողության չհասնելով` կարկառուն հանրապետականը որոշեց Ձմեռ պապիկին հանրապետականացնել: Իհարկե, Ձմեռ պապիկի կերպարով հանդես գալը հանրապետականի համար բարեփոխում է, ու չի բացառվում, որ լավ արդյունքի դեպքում տոնական այս օրերին այլ հանապետականներ ևս Արմեն Աշոտյանի հետ աշխատեն Հանրապետության հրապարակում: Ինչպես ասում են` տոնածառը Տարոնից ` Ձմեռ պապը ՀՀԿ-ից, տարածքը` Հովիկ Աբրահամյանից` նվերներն էլ բրնձով ու ձեթով` Սամվել Ալեքսանյանից, տոմսերի առաքումն էլ `Կարեն Ավագյանից: Շնորհավոր 2016թ: