ՓՄՁ-ները կամ փակվում են, կամ մնում թղթի վրա. Գ. Մակարյան

1,5 տարվա ընթացքում Հայաստանում շուրջ 18 հազար ձեռնարկություն է փակվել. մեր երկրում գրանցված են մոտ 200 հազար ընկերություն, սակայն թե այսքան ընկերությունից որքանն է աշխատում, կամ միայն հաշվետվություն ներկայացնում. որևէ կերպ չի նշվում:

Newspress.am-ին Հայաստանի գործատուների միության նախագահ Գագիկ Մակարյանը նշեց, որ փոքր ու միջին ձեռնարկությունների համար ձևավորվել է անառողջ բիզնես միջավայր և հատկապես փոքր բիզնեսը զգում է կողմնակի ազդեցություններ: Փոքր ու միջին ձեռնարկությունների համար օրենքը գեղեցիկ գրված է, սակայն անհավասարաչափ տեսչական ստուգումները, անհավասար բիզնես մրցակցությունը, տարբեր ձեռնարկատարերին տարբեր մոտեցումները փոքր բիզնեսի համար ստեղծում են անբարենպաստ իրավիճակ:

Ըստ տնտեսագետի, դեռևս չի լուծվում պետական գնումների համակարգում անառողջ վիճակը, ատկատների հարցը, որտեղ ծանոթ-բարեկամների գործոնը դեռևս առկա է:

Նա նաև շեշտեց, որ այն գործարարները, որոնք սեփական միջոցներով են բիզնես սկսում, վարկեր են վերցնում բարձր տոկոսներով, սակայն ձախողվում են, չեն կարողնում տոկոսների ու վարկերի տակից դուս գալ, չեն կարողանում ճիշտ հաշվարկներ անել և այլն:
Ըստ գործատուների միության նախագահի, ոլորտներ կան, որտեղ հնարավոր է լավ բիզնես զարգացնել, սակայն կան ոլորտներ, որտեղ դատապարտված են: Նախ շուկան է փոքր, բնակչությունն է քիչ, հաջողության հասնելու համար պետք է արտահանումը զարգանա:

Տնտեսագետը շեշտեց, որ փոքր բիզնեսներին խանգարում է նաև սուպերմարկետների ցանցը, որտեղ առևտուրը կատարվում է մեկ վայրում, գնորդի համար հարմար է, գները նաև ցածր. այս գործոնները գրավում են գնորդներին, սակայն տարբեր երկրներում սուպերմարկետները թույլ են տալիս կառուցել արվարձաններում, կամ այնպիսի վայրերում, որ փոքր բիզնեսին չխանգարի, իսկ Հայաստանում հակառակն է:

Ինչ վերաբերում է այն դիտարկմանը, որ Հայաստանում բիզնես սկսելը հեշտացել է, Գ. Մակարյանը նկատեց, որ իրոք հեշտացել է գրանցելը, սակայն, թե դրանից հետո ինչ է լինելու բիզնեսի հետ, արդեն ոչ ոքի հետաքրքիր չէ. փոքր բիզնեսին զարգանալու համար հնարավորություններ չեն տալիս:

Գագիկ Մակարյանը նաև հաղորդեց, որ պատգամավորների, պաշտոնյաների ազգականները, կանայք մտնում են բիզնես միջավայր արդեն կապիտալով, որտեղ նրանց համար արտոնյալ միջավայր է ձևավորվում և այս խնդիրների ֆոնին ՓՄՁ-ները կամ լուծարվում են, կամ մնում թղթի վրա, իսկ մի մասն էլ մի կերպ գոյատևում է: