«Ովքեր ասում են` Շուշին հայկական չի, Արցախը երբեք հայկական չի եղել` ժեխ են և իրենց մեջ հայրենիք հասկացությունը չունեն»․ Արշակ Զաքարյան (տեսանյութ)

Այսօր հայի տեսակի կռիվ է Հայաստանում։ Այս մասին ասուլիսի ժամանակ ասաց «Հայոց ազգային գվարդիա» ՀԿ ղեկավար Արշակ Զաքարյանը՝ հավելելով, որ իր համար ժեխ են բոլոր նրանք, ովքեր հայրենիք չեն ճանաչում՝ անհայրենիք են։

«Ես միշտ ասել եմ, որ Հայաստանում հիմա տեսակի կռիվ է: Ժեխ են դարձել անհայրենիք, ստամոքսի հյութով մտածող մարդիկ, որոնց համար միեւնույն է, թե ազգանունը յան, ով կամ օղլիով կվերջանա: Կարեւորը՝ ստամոքսը լիքը լինի: Այս տեսակի կռիվն է: Ես ժեխ չեմ ասում նրանց, ովքեր սխալմամբ հավատացել են այս իշխանությանը: Ով ասում է՝ Շուշին հայկական չի, ով ասում է՝ Էյվազլու ու եսիմ ինչ, ովքեր ասում են՝ Արցախը երբեք հայկական չի եղել, դրանք բոլորը ժեխ են, որոնք իրենց մեջ հայրենիք հասկացությունը չունեն: Իսկ մնացածը, որ ինչ-որ ձևով դեռ հավատում են իշխող քաղաքական ուժին, շփոթված մոլորյալներ են եւ, ի վերջո, հետ են գալիս: Ես այս վերջիններին ժեխ չեմ ասում»,-ասաց  Արշակ Զաքարյանը:

Նրա գնահատմամբ, ժեխը անհայրենիքն է, ում համար տարբերություն չկա՝ վաղը նորից կլինի սովետ, կլինենք օսմանյան կայսրություն, վիլայեթ կամ գուբերնիա:

«Մի զանգված կա, որն անհամբերությամբ սպասում է, որ Սովետական Միությունն է վերականգնվելու: Բայց դրանք չեն պատկերացնում, որ եթե այսօրվա սահմաններով սովետը վերականգնվի, ոնց որ դատարկեցին Նախիջեւանը սովետի ժամանակ, նույն կերպ կդատարկեն Արցախի այն պստիկ կտորը, որ մնացել է, Սյունիքը, Տավուշը, Սեւանի աջ ափը կհանձնեն Ադրբեջանին, Հանքավանում ու Մասիսում գյուղերը կլինեն թուրքական: Նրանք այդ ամենը չեն պատկերացնում: Նրանց համար կարեւորը, որ իրենք արխային լինեն, ինչ-որ տեղից բան թռցնեն ու ստամոքսները լցնեն: Այդպիսիների համար հայրենիք հասկացությունը ստամոքսի այդ սահմանների մեջ է»,-ասաց նա: