Ասենք, ի՞նչն ա պրոբլեմը, ժողովուրդ ջան, ինչի՞ եք եկել․ ձեզ առաջարկվել ա՝ գնացեք դահլիճ, եթե տնօրենը ժամանակ գտնի՝ կմոտենա․․․ Ինֆեկցիոն ԲԿ-ի տնօրինության արձագանքը (վիդեո)

Առողջապահության նախարարությունն ու Ինֆեկցիոն հիվանդությունների ազգային կենտրոնի տնօրինության ներկայացուցիչներին վրդովեցրեց լրատվական միջոցների ներկայությունը։

Նրանցից մեկը, ով ներկայացավ որպես փոխտնօրեն Աշոտ Սարգսյան, նկատեց, որ ինֆեկցիոնը մասնավոր տարածք է և նկարելու իրավունք չունեն։

Նա նշեց նաև, որ աշխատողներին նիստերի դահլիճ են հրավիրել։

Նյութատեխնիկական բաժնի ղեկավարն էլ, ով չհայտնեց իր անուն ազգանունը, շեշտեց․ «Իրանց առաջարկվել ա՝ գնում են դահլիճ, տնօրենը եթե ժամանակ գտնի՝ կմոտենա»։

Ապա նա մոտեցավ բուժաշխատողներին ու ասաց․ «Ասենք, ի՞նչն ա պրոբլեմը, ժողովուրդ ջան, ինչի՞ եք եկել»,- ասաց նա։

Լրագրողի դիտարկմանը, որ բոլորին խնդրի առաջ են կանգնեցրել՝ նրանց ազատելով աշխատանքից, իրեն նյութատեխնիկական բաժնի ղեկավար ներկայացրած անձը արձագանքեց․ «․․․և՞․․․»։

Աշոտ Սարգսյանն էլ դիմեց բուժաշխատողներին հարցադրմամբ, թե՝ չե՞ք ուզում, որ շենքը սարքվի։ Նա անարձագանք թողեց լրագրողի հարցը, թե՝ իսկ ի՞նչ են անելու այս աշխատողները 2 տարի։

Ավելի ուշ փոխտնօրենը նշեց, թե հնարավոր է որոշներին աշխատանքի ընդունեն այլ բուժհիմնարկներում։

«Դա կարող է լինել Մալաթիայում կամ Մասիվում, հիվանդանոցներից մեկում: Մինչև որ շենքը վերապրոֆիլվորվի, հասկանան և վերադառնանք էլի բնականոն ընթացքով աշխատենք:

Եթե թեկուզ ժամանակավոր գնում են այլ հիվանդանոցում աշխատելու, իրենք արդեն այդ հիվանդանոցի աշխատակից պետք է լինեն, ոչ թե Ինֆեկցիոն հիվանդանոցի, դրա համար այդ պրոցեսը գնում է: Քանի որ վերջնական հստակ որոշում չկա, մենք չենք կարող իրենք ասել՝ գիտեք, դուք այստեղից դուրս եք գալու, գնալու ենք այնտեղ աշխատելու»,- ասաց նա:

Աշխատակիցների հարցին, թե այդ դեպքում ինչու են իրենց ստիպում ազատվել իրենց դիմումի համաձայն, փոխտնօրենը պատասխանեց, որ այդ հարցը կճշտի իրավաբանի հետ, ինքը տեղյակ չէ: