2015թ-ին Սերժ Սարգսյանին հաջողվեց «վնասազերծել» Ծառուկյանին

Քաղաքական դաշտում 2015-ի կարևորագույն իրադարձություններից մեկն, իհարկե, «Բարգավաճ Հայաստան» կուսակցության քայլերն էին՝ դրանից բխող իրավիճակների ու իրադարձությունների հետ մեկտեղ։

Ոչ վաղ անցյալում ստեղծված այս կուսակցությունը, որի հիմնական նպատակն էր՝ շահելով ժողովրդի համակրանքն ու վստահությունը ընտրությունների ընթացքում հնարավորինս շատ ձայներ «շորթել» ընդդիմություն ներկայացնող կուսակցություններից, հանկարծ 360 աստիճան շրջադարձ անելով՝ դուրս է գալիս իշխանական կոալիցիայից՝ իրեն հայտարարելով ընդդիմություն։

Եթե նկատի ունենանք այն փաստը, որ ընդամենը 1,5 տարի առաջ կուսակցության առաջնորդ Գագիկ Ծառուկյանը հայտարարել էր, թե «ԲՀԿ-ն ընդդիմություն չի կարող դառնալ», առնվազն տարօրինակ ու անհասկանալի էր ստեղծված իրավիճակը։

Ըստ որոշ վերլուծաբանների՝ հարցերի պատասխանների թելերը հասնում են Մոսկվա։ Հիմանական եզրակացությունն այն էր, թեՄոսկվայից Ծառուկյանին տրվել է իշխանափոխություն անելու «դոբրո»։ Սրա համար հիմք էր հանդիսացել այն, որ ԲՀԿ առաջնորդը փետրվարյան իրադարձություններից առաջ մեկնել էր Մոսկվա, որտեղ հանդիպումներ էր ունեցել Ռուսաստանի քաղաքական շրջանակների ներկայացուցիչների հետ: ԲՀԿ-ական լրատվամիջոցները հայտարարել էին, որ Ծառուկյանը Մոսկվայում բարձր մակարդակի ընդունելության է արժանացրել, ինչը շատերին այն եզրահանգմանն էր բերել, թե Մոսկվան դեմ չէ, որ Սերժ Սարգսյանին հեռացնեն իշխանությունից:
Ինչքանով էր այս ամենը համապատասխանում իրականությանն, այդպես էլ չհստակեցվեց։ Սակայն այս ամենին հաջորդող դեպքերի ընթացքը մեկ անգամ ևս փաստեց, որ «դոբրո» ուներ ոչ թե Ծառուկյանը, այլ Սարգսյանը։ Իսկ թե ո՞վ և ինչպիսի՞ խոստումներով էր ոգևորել ԲՀԿ առաջնորդին, կմնա Ծառուկյանի ու այդ մեկի գաղտնիքը։

Սակայն փաստ է, որ Սերժ Սարգսյանին հաջողվեց «վնասազերծել» Գագիկ Ծառուկյանին և «Բարգավաճ Հայաստան» կուսակցությունը։
Սրան հաջորդեց մարտի 5 –ին տեղի ունեցած ԲՀԿ 8-րդ արտահերթ համագումարը, որտեղ Գագիկ Ծառուկյանը հայտարարեց կուսակցության նախագահի պաշտոնից և ընդհանրապես քաղաքականությունից իր հեռանալու մասին:

«Ես հեռանում եմ ակտիվ քաղաքականությունից: Ես այլևս կուսակցության նախագահ չեմ: Իմ խնդրանքն է Ձեզ՝ ինձ այլևս քաղաքական հարցերով չդիմել, ես չեմ խառնվելու ձեր որևէ որոշմանը: Ես որևէ կապ այլևս չունեմ ԲՀԿ-ի հետ»,- ասաց նա։
Կուսակցության նախագահ ընտրվեց Նաիրա Զոհրաբյանը, իսկ քարտուղար՝ Վահե Էնֆիաջյանը: Իսկ արդեն ազգային ժողովի մարտի 23-ի նիստում «Բարգավաճ Հայաստան» խմբակցության ղեկավար Նաիրա Զոհրաբյանը հայտարարեց, որ «կուսակցությունն այսուհետ ընդդիմություն է»:

Այս ամենի արդյունքում ԲՀԿ-ն կորցրեց երբեմնի ունեցած հեղինակությունը, նաև՝ դերն ու նշանակությունը։ Սակայն…«Բարգավաճ Հայաստան» կուսակցությունը ստեղծվել էր Գագիկ Ծառուկյանի կողմից և ընկալվում ու ընդունվում էր որպես Գագիկ Ծառուկյանի կուսակցություն։ Ասել է թե՝ այն Մարդ- կուսակցությունն էր և նրա գործունեությունը պտտվում էր միմիայն Ծառուկյանի անվան, բարեգործության ու հեղինակության շուրջ։
Կուսակցության պահպանումը ներկա ֆորմատով, առավել ևս ներկա կուսակցապետով՝ իր էմոցիոնալ ու անկանխատեսելի հայտարարություններով, չի կարող համարվել ու ընդունվել որպես «Բարգավաճ Հայաստան» կուսակցության գործունեություն ու գործելաոճ։ Ուստի, առավել նպատակահարմար կլիներ, որպեսզի այն փոխեր իր անվանումը, հանդես գար նոր անվանումով և իր գործելաոճին հարիր՝ նոր գաղափարախոսությամբ։