Ալեքսանյանի անվան հետ կապված ծխախոտի արտադրութամբ զբաղվող «ԴրիմՔոմփանի» ընկերությունն ազատվեց մաքսատուրքից. Փաշինյանը ուզում է ազատել դաշտը` իր любимчик-ի համա՞ր

Կառավարությունն իր այսօրվա՝ հունվարի 5-ի նիստում որոշում կայացրեց մաքսատուրքի արտոնություն տրամադրել «ԴՐԻՄՔՈՄՓԱՆԻ» սահմանափակ պատասխանատվությամբ ընկերությանը:

Որոշման հիմնավորման մեջ նշվում է, որ «ԴՐԻՄՔՈՄՓԱՆԻ» ընկերության կողմից ներմուծվող հումքը օգտագործվելու է ծխախոտի արտադրության համար (ք․ Երևան): Ընկերությունը հիմնադրվել է 2021 թվականին: Դրիմքոմփանի ընկերության ռազմավարությունը միտված է սեփական արտադրանքը արտաքին շուկաներում ներկայացնելուն, որի նպատակով նախատեսվում է արտադրանքի 80%-ի արտահանում ԵԱՏՄ և երրորդ երկրներ:

Ծրագրի շրջանակում նախատեսվում է իրականացնել 11․9 մլրդ դրամի ներդրում, որից 2 մլրդ դրամը նոր հոսքագծի ձեռքբերման համար, իսկ մնացած մասը՝ շինարարական աշխատանքների իրականացման և հումք ու նյութերի ձեռքբերման համար։ Նախատեսվում է ներդրումային ծրագրի շրջանակում մինչև 2024թ ստեղծել 100 նոր աշխատատեղ` մինչև 450,000 դրամ միջին աշխատավարձով։

Արտոնություն ստանալու համար ներկայացված ապրանքների արժեքը կազմում է 9․9 մլրդ դրամ: Մաքսատուրքից ազատման արտոնությունը գնահատվում է 937․7 մլն դրամ:

Հարկ է նկատել, որ ծխախոտի արտադրությամբ զբաղվող այս ընկերությանը արտոնություններ տալով, կառավարությունը նույն նիստում հավանություն տվեց նաև հակածխախոտային օրենսդրության փոփոխություններին, ըստ որոնց արգելվում է գովազդել ծխախոտը։

Ավելին` Փաշինյանն ինքը կոչ արեց չծխել ու մինչև անգամ «տներում էլ արգելել ծխախոտի օգտագործումը»...

 Իհարկե, կարող է թվալ, թե կառավարության մի ձեռքը չգիտի` ինչ է անում մյուս, բայց եթե հաշվի առնենք, որ օրինակ ծխախոտի արտադրությամբ զբաղվող այս ընկերությունը կապվում է Սամվել Ալեքսանյանի անվան հետ, ապա կարելի է ենթադրել, որ հակածխախոտային կոչերը պատահական չեն։

Հարկ է հիշել, թե վերջին շրջանում որքան արտոնություններ տրամադրվեցին Լֆիկ մականունով Սամվել Ալեքսանյանին։

Վերջինս նախորդ իշխանության ժամանակ հայտարարում էր, թե ինքը քաղաքական գործիչ է և բիզնես չունի։ Իսկ իշխանափոխությունից հետո սահուն անցավ երկրի նոր ղեկավարի տրամադրության տակ ու, սիրաշահելով տիրոջը, արտոնություններ ստացավ։
Ու քանի որ, ըստ լուրերի, Ալեքսանյանը կապ ունի նաև այս ընկերության հետ (թեև բաժնետերն ու տնօրենը փաստաթղթերով Արմեն Մկրտչյանն է), ուստի դժվար չէ պատկերացնել, թե ինչի հանար է կազմակերպվել ծխախոտը «տակից» վաճառելու կրկեսը։

Չի բացառվում, որ Փաշինյանը ուզում է ծխախոտի շուկայում ազատել դաշտը` իր любимчик գործարարի համար։