Խոհեմություն և լրջամտություն երկրի ղեկավարներին ու ընդդիմությանը, սեր ու հանդուրժողականություն՝ հայ հասարակությանը

Սիրելի հայրենակիցներ, ընթերցողներ, գործընկերներ, մեր հայ ժողովուրդ...

Հայ ազգի համար ծանր էին նախորդ 2 տարին. պատերազմ, կորուստներ ու պանդեմիա, որոնց հետևանքներն անդառնալի են:

Ինչո՞ւ այդպես ստացվեց. այս հարցը հնչեց ողջ տարվա ընթացքում, եղան նաև որոշ պատասխաններ, բայց զրո քայլ՝ մեղավորներին պատժելու, իրավիճակը շտկելու և հետագա հնարավոր կորուստները կասեցնելու ուղղությամբ...

Այս ֆոնին դժվար է ակնկալել բարեմաղթություն, հաջողություն, երջանկություն, ձեռքբերումներ, բայց պետք է հավատալ՝ դեռ ամեն ինչ կորած չէ, դեռ հնարավոր է եղածը փրկել...

NEWSPRESS.am կայքի ողջ անձնակազմը՝ հիմնադիր-տնօրեն Արիանա Հովսեփյանի գլխավորությամբ մաղթում է, որ 2022 թվականը լինի սիրո, հանդուրժողականության, համերաշխության, համբերության, խոհեմության տարի:

Խոհեմություն, լրջամտություն ու վճռականություն մեր երկրի ղեկավարներին ու նաև քաղաքական ընդդիմությանը:

Համբերություն ու հանդուրժողականություն մեր հայ հասարակությանը:

Ցանկանում ենք, որ 2022 թվականը մեր մի պատառ դարձած երկրի համար լինի  նվաճումների ու հաջողությունների տարի։

Առողջ միտք ու հոգի ենք մաղթում մեր հասարակությանը...

2021 թվականն այլևս պատմություն դարձավ՝ թերթելով հայ հասարակության ինքնիշխան պետականություն ու արդար երկիր ունենալու երազանքի ևս մեկ էջ։

Թող 2022 թվականը լինի ավելի հաջող մեր պետականության պահպանման ու ոչնչացող արժեհամակարգի վերականգնման համար:

Թող ոչ մի արհավիրք չխաթարի մեր վաղվա սերնդի՝ հայ սերնդի ապագան։

Թող Նոր տարին արգասաբեր լինի ողջ հայության համար, լինեն նրանք թե՛ սփյուռքում, թե՛ Հայաստանում, թե՛ Արցախում։

Թող հայությունը չբաժանվի ճակատների, սև ու սպիտակի, չարերի ու բարիների:

Թող առողջանա մեր վիրավոր բանակը ու շարունակի ռազմատենչ շնչով և հայրենասիրությամբ պաշտպանել երկրի սահմանները թշնամուց: Քաջություն, անկոտրուն կամք ու անձնվիրություն զինվորին։

Թող երբեք չթրջվեն մեր հայ զինվորին սպասող մոր ու հոր, քրոջ ու եղբոր, կնոջ ու երեխայի աչքերը...

Գնահատեք և պահպանեք ունեցածը...

Շնորհավոր թող լինի Ամանորն ու Սուրբ Ծնունդը