Մարդու շորի վրա մի կոճակ կա, որ չես օգտագործում, եթե դու քեզ հասցրել ես այդ կոճակի կարգավիճակին՝ ինչ ասեմ․ Ռոբերտ Քոչարյան

ՀՀ երկրորդ նախագահը նշեց, որ Հայաստանը կորցրել է ամենամարտունակ բանակ ունեցող երկրի կարգավիճակը, ստացել ենք մի կարգավիճակ, երբ անընդհատ պաշտպանության կարիք ունենք: Այս մասին ասուլիսի ժամանակ ասաց ՀՀ երկրորդ նախագահ Ռոբերտ Քոչարյանը՝ անդրադառնալով Ռուսաստանի հետ համագործակցության մասին հարցին։

Նա հիշեց իր նախագահության տարիները, երբ Ռուսաստան-ՆԱՏՕ հարաբերություններում Ռուսաստանն ավելի շատ ծրագրեր ուներ ՆԱՏՕ-ի հետ, քան Հայաստանը, և ՌԴ-ՆԱՏՕ խորհուրդ կար։

Ռոբերտ Քոչարյանը հակառուսական և հակաչինական ծրագիր որակեց վերջերս ԱՄՆ-ի կազմակերպած Ժողովրդավարության համաժողովը։

«Մենք այստեղ ի՞նչ ունենք: Ինչ-որ մի 3 րոպեանոց անբովանդակային, անհասկանալի ելույթի համար մենք մտել ենք մի ֆորմատի մեջ, որը քո ռազմավարական դաշնակցի, որը քո երկրի սահմանների անվտանգությունն է ապահովում, մենք այդ երկրի դեմ կազմակերպված միջոցառման ինչի՞ ենք մասնակցում»,- նկատեց ՀՀ երկրորդ նախագահը՝ շեշտելով, որ ինքը չունի դրա բացատրությունը:

Նրա խոսքով՝ միջոցառումը փորձ էր վերակենդանացնել մի թրենդ, որը ժամանակին ԽՍՀՄ-ը փլուզվելուց հետո բավական հզոր ներուժ ուներ և այն ժամանակ միտքն այն էր, որ ամբողջը ժողովրդավարացնելով ավելի կանխատեսելի ու անվտանգ աշխարհ ունենալ, սակայն դրան հաջորդեցին աղետալի հետևանքներով գունավոր հեղափոխություններ:

Ըստ ՀՀ երկրորդ նախագահի՝ Արևմուտք-Ռուսաստան հարաբերություններում սրումը երբ ուժեղանա և ծայրահեղ դրսևորումներ ստանա, այն ժամանակ Հայաստանին կարող են ոտքի տակ գցել, եթե չունենանք ուժեղ բանակ և ամուր անվտանգային համակարգ:

Քոչարյանը նկատեց, որ պատերազմից հետո իրավիճակ է փոխվել Հարավային Կովկասում, որը կարելի է բնութագրել տարածաշրջանի աշխարհաքաղաքական վերափոխում:

«Երբ Թուրքիան միացավ այս ամենին և Թուրքիա-Ադրբեջան տանդեմը լրիվ այլ բնույթ ստացավ, այլևս հավասար հեռավորություն պահել Հայաստանի ու Ադրբեջանի միջև և՛ դժվար է, և՛ ես համոզված եմ, որ նաև մի քիչ անհասկանալի է հայկական կողմի համար և չեմ կարծում, որ երկարատև առումով դա լավ բանի կարող է բերել, բայց այդ ձևաչափը դեռ չի փոխվել»,- ասաց Ռոբերտ Քոչարյանը։

«Իրենք դեռ չեն ադապտացրել իրենց գործունեությունն այդ նոր էլեմենտի հետ: Թուրքիայի դերը շեշտակի աճել է և շարունակելու է աճել: Ես ակնկալում եմ և համոզված եմ, որ Ռուսաստանի ԱԳՆ-ն երևի մշակման մեջ են, հաշվարկներ անում են: Բայց մենք չենք կարող ՌԴ-ից պահանջել, որ ավելի հայ լինեն, քան մենք: Մենք որպես դաշնակից երկիր պետք է չկորցնեինք մեր կարգավիճակն այս տարածաշրջանում»,- ասաց նա։

Ռոբերտ Քոչարյանը նկատեց, որ ՀՀ իշխանություններն ակնհայտ թուրքական շահերն են սպասարկում։

«Ես մի անգամ ասել եմ, որ եթե ՀՀ ղեկավարը լիներ Թուրքիայի գործակալ, կաներ ճիշտ այս քայլերը»,- ասաց ՀՀ երկրորդ նախագահը։

Նա նկատեց, որ գործող իշխանությունների օրոք երկրի կշիռը փոքրացել է և այս ամենի հետ միասին վերջիններս անհասկանալի ինչ-որ ձևաչափերի մեջ են մտնում:

«Գիտեք, մարդու շորի վրա մի կոճակ կա, որ չես օգտագործում: Օրինակ՝ վերնաշապիկի վերևի կոճակը, շալվարի վրա էլ այդպիսի կոճակներ կան: Եթե դու քեզ հասցրել ես այդ կոճակի կարգավիճակին, բայց մտնում ես նման պրոցեսների մեջ, ի՞նչ ասեմ։ Դու չպետք է գլուխդ կորցրած թռնես մի վագոնի մեջ, որը ուրիշ տեղ է տանում: Դա որևէ աղերս չունի քո ՀԱՊԿ-ի, ԵԱՏՄ-ի մասնակցության հետ, հիմա դու կողմնորոշվիր՝ դու որտե՞ղ ես»,-ընդգծեց նախկին նախագահը: