Այդ ճանապարհին ենք՝ ես ժամկետներ եմ նշել․ Ռոբերտ Քոչարյանը՝ զանգվածային ընդվզման մասին

«Հայաստան» դաշինքի անդամները ու մասնավորապես ՀՀ երկրորդ նախագահ Ռոբերտ Քոչարյանը տեսնում են իրենց որոշ համախոհների հիասթափությունը՝ կապված իրենց քաղաքական ուժի կողմից վճռորոշ քայլերի չգնալու հետ։ Այս մասին ասուլիսի ժամանակ ասաց ՀՀ  երկրորդ նախագահ Ռոբերտ Քոչարյանը։

Միևնույն ժամանակ երկրորդ նախագահը նկատում է, որ հատկապես ընտրություններից հետո, տեսնում են նաև այս իշխանության վարկանիշի շեշտակի անկում, որը նույնիսկ իրենց համար անսպասելի էր։

«Հասկանում եմ, որ մեզնից սպասում են ավելի արմատական գործողություններ։ Ընտրություններից հետո մենք տեսնում ենք այս իշխանության վարկանիշի շեշտակի անկում, նույնիսկ մեզ համար անսպասելի անկում. բացատրություն չունեցող ինչ-որ երեւույթ տեղի ունեցավ։ Մեր գնահատականով՝ այդ վարկանիշի անկումը չի տրանսֆորմացրել այդ զանգվածների պատրաստակամությանը՝ ակտիվ պայքարելու համար։ Մենք համոզված ենք, որ այս մարդիկ իրենց հոժար կամքով իշխանությունը չեն թողնելու»,- նշեց երկրորդ նախագահը։

Ըստ նրա՝ իշխանությունից հեռացնելու համար պետք են զանգվածային ընդվզումներ.

«Ոչ թե 10 հազար մարդ, այ զանգվածային։ Մենք այսօր չենք տեսնում, որ դա հասունացած է։ Դա հիասթափեցնում է մեր կողմնակիցների մի հատվածին, որոնք պատրաստ են այդ պայքարին, բայց մենք նաեւ չենք կարող այդ մարդկանց չպատրաստված տանել նման փորձությունների»,-ասաց Ռոբերտ Քոչարյանը՝ հավելելով, որ ոչ միայն պատրաստ են, այլև պատրաստում են մարդկանց զանգվածային ընդվզման։

«Այդ ճանապարհին ենք։ Ես ժամկետներ եմ նշել, այդ ժամկետների մեջ տեղավորվելու ենք։ Ինչ-որ բաներ կան, որ պիտի հասունանան։ Ինքս պատրաստ եմ ամեն ինչի, բայց պետք է զգաս, որ դա լինելու է ոչ թե այսպես ասած՝ ինքնահրկիզման ակտ, դրանք լինելու են քայլեր, որոնք մեծ հավանականությամբ պետք է բերեն հաջողության։ Հակառակ դեպքում մեզ մեղադրելու են՝ բա դուք առաջնորդ եք, ինչու չեք հաշվարկել»,-ասաց Ռոբերտ Քոչարյանը։