Ես տեսնում եմ քայլերի հերթականություն, որով կարելի է ինչ-որ բան փրկել. Ռոբերտ Քոչարյան (տեսանյութ)

Համոզված եմ եղել, որ այդ հարցերը դուք տալու եք, տվել են ձեզ։ Այսպես արձագանքեց ՀՀ երկրորդ նախագահ Ռոբերտ Քոչարյանը լրագրողի հարցին, թե ինչ ծրագրեր ունի նա առաջիկայում՝ երկիրն այս վիճակից դուրս բերելու համար․ պատրաստվո՞ւմ է գալ իշխանության։

Ռոբերտ Քոչարյանը նկատեց, որ հստակ է, թե այս իշխանությունն ուր է ուզում մեզ տանել, բայց միևնույն ժամանակ նա նկատում է, որ ակտիվ դիվանագիտական աշխատանքի դեպքում հնարավոր է ինչ-որ բան այս իրավիճակում փրկել։ Իսկ քանի որ այս իշխանությունն ի զորու չէ դա անել, ուստի Ռոբերտ Քոչարյանն առաջարկում է հնարավորություն տալ դա անելու այն ուժերին, ովքեր կարող են։

«Այո, ես տեսնում եմ այդ ճանապարհը, շատ բարդ է լինելու․ առանց կորստի չենք ստանալու այն, ինչ մենք կորցրել ենք, բայց որոշ ուղղություններով մենք կարող ենք ինչ-որ բան շտկել՝ նաև Արցախի կարգավիճակի մասով»,- ասաց Ռոբերտ Քոչարյանը։

Նա ասաց, որ կարող է պատասխանել, թե ինչպես կարող է շտկել իրավիճակը։ Ռոբերտ Քոչարյանը հիշեցրեց, թե ինչ փաստաթուղթ էր դրված բանակցային սեղանին՝ 1998-ից մինչև 2008 թվականը։ Նրա խոսքով՝ այդ ընթացքում հետևողական գործողություններով լուրջ հաջողություններ են արձանագրվել։

Այսօր նա չի կարող հստակ մատնանշել, թե կոնկրետ որ քայլերով է հասնելու արդյունքի, բայց տեսնում է որոշակի քայլերի հերթականություն, որով կարող է ինչ-որ բան փրկել, և որն ի զորու չէ անել օրվա իշխանությունը։

«Դետալների մեջ չեմ մտնի այստեղ, որովհետև սրանք փորձելու են այդ ճանապարհները ևս փակել»,- եզրափակեց Ռոբերտ Քոչարյանը։