Նոր մանրամասներ «Գուդ վին» բուքմեյքերական գրասենյակում տեղի ունեցած սպանությունից

Քննչական կոմիտեն նոր մանրամասներ է հայտնել այսօր՝ դեկտեմբերի 24-ին, Երեւանի «Շենգավիթ» համայնքում գործող «Գուդ վին» բուքմեյքերական գրասենյակում տեղի ունեցած սպանության մասին:

Ըստ ՔԿ հաղորդագրության՝ դեկտեմբերի 24-ին ահազանգ է ստացվել, որ «Գուդվին-Բետ» ՍՊԸ-ին պատկանող գրասենյակում հայտնաբերվել է աշխատակցի դին։

Անմիջապես դեպքի վայր է մեկնել քննչական-օպերատիվ խումբը՝ Շենգավիթ վարչական շրջանի քննչական բաժնի ավագ քննիչի գլխավորությամբ։

Դեպքի վայրում հայտնաբերվել է նշված գրասենյակի աշխատակից Ա.Նազարյանի դին՝ կտրած-ծակած բազմաթիվ վնասվածքներով։ Կատարվել է դեպքի վայրի զննություն, օպերատիվ ձեռնարկվել անհրաժեշտ քննչական և դատավարական այլ գործողություններ՝ դեպքի հանգամանքները պարզելու ուղղությամբ։

Նախնական տվյալներով՝ 2015թ. դեկտեմբերի 23-ի լույս 24-ի գիշերը՝ մինչև ժամը 11-ն ընկած ժամանակահատվածում, տեղի է ունեցել ավազակային հարձակում՝ գումար հափշտակելու դիտավորությամբ։ Առերևույթ հանցագործություն կատարած անձը որպես զենք օգտագործվող սուր կտրող ծակող գործիքով բազմաթիվ հարվածներ է հասցրել գրասենյակում աշխատող Արթուր Նազարյանի որովայնի, պարանոցի և կրծքավանդակի հատվածներին՝ սպանելով նրան ու հափշտակել գումար:

Դեպքի առթիվ հարուցվել է քրեական գործ Քրեական օրենսգրքի 104-րդ հոդվածի 2-րդ մասի 8-րդ կետով և 175-րդ հոդվածի 2-րդ մասի 4-րդ կետով։

Ձեռնարկվում են անհրաժեշտ միջոցառումներ՝ առերևույթ հանցագործություն կատարած անձին հայտնաբերելու ուղղությամբ։

Քրեական գործով արդեն իսկ պարզվել են մի շարք այլ հանգամանքներ, այդ թվում՝ տվյալներ ձեռք բերվել առերևույթ հանցագործություն կատարած անձի ինքնության վերաբերյալ, սակայն քննության շահերից ելնելով այլ մանրամասներ քննության այս փուլում հրապարակման ենթակա չեն։