Ավարտվել է ապօրինի վարձատրության դեպքի առթիվ հարուցված քրեական գործի նախաքննությունը․ ՔԿ

ՀՀ քննչական կոմիտեի Գեղարքունիքի մարզային քննչական վարչությունում իրականացված մեծածավալ քննչական և դատավարական այլ գործողությունների արդյունքում պարզվել են ապօրինի վարձատրություն ստանալու և տալու դեպքի մի շարք հանգամանքներ:

Քննությամբ պարզվել է, որ ՀՀ գյուղատնտեսության նախարարության Սննդամթերքի անվտանգության պետական ծառայության Գեղարքունիքի մարզային կենտրոնի գլխավոր մասնագետ-տեսուչը, 2010-2019թթ. ընկած ժամանակահատվածում զբաղեցնելով նշված պաշտոնը և պաշտոնի անձնագրով ունենալով մարզի տարածքում սննդամթերքի բնագավառում ՀՀ օրենսդրությամբ սահմանված պահանջների խախտումների դեպքերում սննդամթերքի արտադրության, պահպանման, տեղափոխման, իրացման, վաճառքի կասեցման, խախտումների վերացման, ինչպես նաև սննդամթերքի օգտագործման գործընթացի նկատմամբ վերահսկողություն իրականացնելու պարտականություն, ծառայողական դիրքն օգտագործելով՝ Վարդենիսի տարածաշրջանում մսամթերքի փորձաքննություն իրականացնող ԱՁ-ի տնօրենից պահանջել և ստացել է առանձնապես խոշոր չափերով՝ 3.918.000 ՀՀ դրամ ապօրինի վարձատրություն՝ իր լիազորությունների շրջանակներում վերջինիս օգտին վերոնշյալ պարտականությունները չկատարելու համար:

Ձեռք բերված բավարար ապացույցների համակցությամբ՝ Գեղարքունիքի մարզային կենտրոնի գլխավոր մասնագետ-տեսուչին մեղադրանք է առաջադրվել՝ ՀՀ քրեական օրենսգրքի 311.1-րդ հոդվածի 4-րդ մասի 2-րդ կետով, իսկ ԱՁ-ի տնօրենին՝ ՀՀ քրեական օրենսգրքի 312.1-րդ հոդվածի 3-րդ մասի 1-ին կետով:

Նախաքննությունն ավարտվել է, և քրեական գործը՝ մեղադրական եզրակացությամբ, ուղարկվել դատարան:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ,քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով: