Միշս, շատ էիր սիրում ծնունդիդ օրը տոնածառը զարդարած լինի` տոնածառ եմ բերել, բալես. ծնունդիդ մոմերը եղբայրդ փչեց, երգում էր քո համար... զոհվածի մոր հուզիչ գրառումը (լուսանկարներ)

Արցախյան 44-օրյա պատերազմում զոհված Միշա Մելիքի Գրիգորյանն այսօր կդառնար 20 տարեկան։ Նրա մայրը` Աննա (Շուշան) Թամազյանը, 20-ամյակին նվիրված, ծննդյան տորթ է պատրաստել և տոնածառ է տարել որդու գերեզմանին, քանի որ Միշան սիրել է միշտ իր ծննդյան օրը տոնածառը զարդարված լինի։

Շուշան Թամազյանը լուսանկարներ է հրապարակել ֆեյսբուքյան իր էջում ու կից հուզիչ գրառում արել։

Զոհված հերոսի մոր գրառումը Newspress.am-ը ներկայացնում է ամբողջությամբ

«20 տարի առաջ այս օրը մտքովս էլ չէր անցնում, որ լույս աշխարհ եմ բերել հերոսի, ընտրյալի ու ամենամաքուրի:

Իմ ՄԻՇԱՍ ծնունդդ շնորհավոր բալես, իմ զինվոր բալա, իմ առաջնեկ ու իմ ամենա- ամենա։

Ուղիղ երկու տարի առաջ այնքան երջանիկ էի, այնքան ուրախ, որդիս չափահաս էր դառնում ու նաև բանակ էր գնում։ Այնքան հպարտ էի քեզանով, գիտեի, որ պիտի պատիվդ բարձր ծառայես իմ աշխարհ:

Բայց մտածում էի, որ հաստատ պիտի տուն գաս իմ բալա, ծաղիկները ձեռքիդ պիտի գաս, պիտի ընդառաջ վազեմ քեզ ու գրկեմ, կարոտս առնեմ, պիտի կրկին ու կրկին հպարտանամ ու աշխարհի ամենաերջանիկը լինեմ:

Էլի հպարտ եմ բալես, բայց այս հպարտությունը անչափ ցավոտ է բալես:

Ախր ես հիմա վերադարձիդ պիտի պատրաստվեի, քո սիրած մրջնաբույնն ու սնիկերսը պիտի թխեի: Ախր ձեռքերս կոտրվել են բալես։ Ընդամենը հինգ օր է մնացել վերադարձիդ։

Արի՛, բալես արի՛, արի՛ իմ գիրկը բալես, արի՛, որ ապրեմ ՄԻՇԱԱԱԱՍ

ՈՒզում եմ գոռամ բալես, բայց ամուր սեղմում եմ բերանս, հոգուս ազատություն տալիս իմ ամենաթանկս, անկեղծս, մաքուրս:

Միշս շատ էիր սիրում ծնունդիդ օրը տոնածառը արդեն զարդարած լինի, մեեեեծ ու լուսավոր տոնածառ, բերել եմ բալես, շուտ եմ բերել, որ ծնունդիդ արդեն պատրաստ լինի, կներես բալես քո սիրած չափսը չի ու անփայլ է։

Իսկ ծնունդիդ մոմերը եղբայրդ փչեց, երգում էր քո համար, ափսոս, որ դու չէիր այստեղ, դու երկնքից էիր հետևում մեզ:

Սիրում եմ քեզ ՄԻՇՍ

Հոգիդ լույսերի մեջ լինի բալեես»