Լինենք ուժեղ, հզոր, որպեսզի մեր ներողամտությունն աստվածային առաքելություն ընկալվի. Արշակ եպիսկոպոս Խաչատրյան

Երևանում մեկնարկել է Հայաստանի Հանրապետական կուսակցության 17-րդ համագումարը։

Այն մեկնարկեց ՀՀ օրհներգով, որը կատարեց երգչուհի Շուշան Պետրոսյանը, ապա տերունական աղոթքով իր ողջույնի խոսքում ասաց Մայր Աթոռ Սուրդ Էջմիածնի դիվանապետ Տեր Արշակ Եպիսկոպոս Խաչատրյանը: 

«Այսօր, երբ մեզ պարտադրվում է խաղաղության օրակարգ, ուզում եմ հիշել ՀՀԿ-ի գաղափարական հոր՝ Նժդեհի խոսքերը, թե խաղաղությունը ոչ թե նվիրվում է, այլ՝ նվաճվում։ Խաղաղությունը ձեռք բերելու համար մեզ պարտադրված ներողամտությունն ավելին չէ, քան թուլությունը և տկարությունը։ Նժդեհը, որին հաճախ մեղադրել են ոչ քրիստոնեական հայացքներ ունենալու մեջ, լավագույնս ձևակերպել է Քրիստոսի կերպար իր մտածումների մեջ։ Ներողամտությունն ուժեղների առանձնաշնորհն է, ասում է Նժդեհը, այն արժեք է ստանում, երբ դրսևորվում է այն դեպքում, երբ կարող է նաև չդրսևորվել»,- ասաց Արշակ եպիսկոպոս Խաչատրյանը:

Նրա խոսքով՝ ՀՀԿ համագումարն առավելապես մարդկանց այնպիսի խմբի հետ առնչվող միջոցառում է, որոնց գործողությունները կապված են ՀՀ անկախության պատմության կերտման հետ:

Մայր Աթոռ Սուրբ Էջմիածնի ներկայացուցիչը շեշտեց, որ այդ պատմությունը կերտվել է Աշոտ Նավասարդյանի, Վազգեն Սարգսյանի, Անդրանիկ Մարգարյանի և Սերժ Սարգսյանի գործուն ջանքերով:

Նկատելով, որ ՀՀԿ-ն մի պատմություն է, որն ընդգրկում է ՀՀ-ի մաքառումների, զրկանքների և հաղթանակների ընթացքը՝ Արշակ Եպիսկոպոս Խաչատրյանն ասաց.

«Այսօր՝ առավել քան երբեևէ, երբ մեր երկիրն դիմագրավում է ծանրագույն փորձությունների, երբ արհավիրքը մուտք է գործել յուրաքանչյուր հայի օջախ, առավել քան անհրաժեշտ է ազգային, հոգևոր լիցքերով զինավառված այդպիսի գաղափարախոսություն կրող, քաղաքական, հասարակական, ազգային ուժերի համախմբումը և գործուն մասնակցություն, ներգրավվածություն ազգային-հասարակական մեր կյանքին»: