Ժամերի ընթացքում Արմեն Չարչյանը լինելու է ազատության մեջ. Արամ Վարդևանյան

ՍԴ-ն նորարարություն չի կատարել, ՍԴ-ն վերարտադրել է Սահմանադրության 96-րդ հոդվածը` ԱԺ պատգամավորը չի կարող զրկվել ազատությունից՝ բացառությամբ ԱԺ համաձայնության։

Այս մասին լրագրողների հետ զրույցում ասաց «Հայաստան» խմբակցության պատգամավոր, իրավապաշտպան Արամ Վարդևանյանը` հերթական անգամ կրկնելով, որ պատգամավորներն ապօրինի են պահվում կալանավայրում:

Վարդևանյանը վստահեցրեց, որ ժամերի ընթացքում Արմեն Չարչյանը լինելու է ազատության մեջ։

«Այստեղ երկրորդ կարծիք չկա, ՍԴ որոշումը պարտադիր է բոլորի համար, մանևրելու տեղ բացարձակ չկա։ Ես վատ եմ զգում, որ մեր դատավորները և դատախազները հայտնվել են նման իրավիճակում, բայց մենք դրա մասին ի սկզբանե զգուշացրել էինք»։ Վարդևանյանը նշեց, որ Արմեն Չարչյանի ազատ արձակվելու համար պարտադիր չէ դատարանի որոշումը, քանի որ ՍԴ որոշումը պարտադիր է նաև քրեակատարողական ծառայության համար։

«Բոլոր այն դատավորները, որոնք կայացրել են այդ խայտառակ դատական ակտերը և պատգամավորներին պահել են կալանավորված, վստահեցնում եմ, որ օրենքով սահմանված բոլոր միջոցները ձեռնարկվելու են և դրանց հետևանքները լինելու են, որովհետև ՀՀ-ում չպետք է լինեն դատավորներ, որոնք չեն տիրապետում Սահմանադրության տարրական կանոններին։ Այստեղ պրոֆեսիոնալության խնդիր ունենք»,-ասաց Վարդևանյանը:

Հարցին` հնարավոր համարո՞ւմ է, որ կալանավորված պատգամավորների նկատմամբ քաղաքական հետապնդումները շարունակվեն, Վարդևանյանը պատասխանեց. «5 ամիս նրանց ապօրինի կալանավորելուց հետո իրավունքների խախտման այդ ինչ ախորժակ պետք է ունենան, դրանից ավել էլ ինչ պետք է անեն։ Արմեն Չարչյանին ոչ միայն ապօրինի հինգ ամիս կալանավորել են, այլ նաև առողջությունն են քայքայել։ Բոլորս էլ հասկանում ենք, որ սա բռնապետություն է, որի դեմ ամեն օր պայքարելու ենք»,- ասաց պատգամավորը։