Արցախի Հանրապետության ճանաչումն այլընտրանք չունի. համասփյուռ հայությունը պետք է միասնական կոչով դիմի աշխարհին. Թևան Պողոսյան

1991թ. դեկտեմբերի 10 – Արցախի Հանրապետության անկախության հանրաքվեի օր։ Այո, 30 տարի առաջ արցախցիները կատարեցին իրենց քայլը դեպի մեր ազգային երազանք՝ ՄԻԱՑՈՒՄ։ Այս մասին ֆեյսբուքյան իր էջում գրել է քաղաքագետ Թևան Պողոսյանը։

«Այսօր՝ 2021թ. դեկտեմբերի 10-ին լրանում է Արցախի Հանրապետության անկախության հանրաքվեի 30-րդ տարեդարձը։ Արցախի հայությունը երեք տասնամյակ առաջ այս օրն իր քվեով ստանձնեց Հայոց հայրենիքի անկախության և պետականաշինության իր բաժին պատասխանատվությունը։

Դժվարին ճանապարհ է անցել Արցախի Հանրապետությունը և այսօր էլ կանգնած է ծանրագույն մարտահրավերների առջև։ Այսօրվա խորհուրդն է նաև մարդու իրավունքների պաշտպանությունը, քանի որ դեկտեմբերի 10-ը Մարդու իրավունքների պաշտպանության միջազգային օրն է: Այս օրը պետք է դառնա նաև մեր պատասխանատվության օրը, պատասխանատվություն, որով համայն հայությունն ստանձնում է արցախահայության պաշտպանությունը և Արցախի Հանրապետության անկախության ճանաչման գործընթացն իր ավարտին հասցնելու ու մեր երազանքին մոտենալու պարտականությունը։

Այսօր ես իմ խոսքն եմ ուղղում համայն հայությանը. մեր պայքարը կարիք ունի ազգային միասնության և համախմբման, որպեսզի ի զորու լինենք հասնելու մեր ազգային նպատակին։ Այսօր համասփյուռ հայությունը պետք է նաև միասնական կոչով դիմի աշխարհին, ամեն մեկն իր բոլոր գործընկերներին. Արցախի Հանրապետության ճանաչումն այլընտրանք չունի, արցախցիների ինքնորոշման իրավունքի հանդեպ հարգանքը չի կարող ստորադասվել, և մենք գործադրելու ենք մեր անհատական կարողությունները՝ ի շահ Արցախի Հանրապետության և հայ ազգի։

Հ.Գ. Այսօր չլինել Արցախում և չլինել Վերածննդի հրապարակում չէի կարող, իսկ երազում էի որ աշխարհի հայությունը այստեղ լիներ, բոլոր 1991ից ի վեր ՀՀ և ԱՀ նախկին և ներկա պետական այրերին։ Բայց երազելը չեմ դադարելու»։