Հայաստանը դեռևս չի կարողանում ՌԴ-ում գրավել թուրքական ապրանքների տեղը

Թուրքական օդուժի կողմից ռուսական Սու-24-ի խոցումից հետո ՌԴ կառավարությունն արգելել է Թուրքիայից սառեցված մսի և մսամթերքի, թռչնամսի, կաթի և կաթնամթերքի, կաթնաշոռի և պանրի, լակտոզայից զերծ արտադրանքի, ձկան, ընկույզի և մրգի, բանջարեղենի, հատապտղի և կանաչիի, լոլիկի, սոխի, վարունգի, ցիտրուսների, խաղող, խնձորի, տանձի, ծիրանի, դեղձի և նեկտարինի, սալորիի, ելակի, աղի ներմուծումը: Այս ընթացքում, մասնավորապես ՀՀ գյուղատնտեսության նախարարությունը գյուղոլորտի ներկայացուցիչների հետ խորհրդակցություն էր անցկացրել՝ խթանելու գյուղմթերքի արտահանումը դեպի Ռուսաստանի Դաշնություն: Արտահանման խնդրին անդրադարձել էր նաև ՀՀ վարչապետ Հովիկ Աբրահամյանը, նշելով, որ «կառավարությունը պատրաստ է աջակցել արտահանման խթանմանն ուղղված յուրաքանչյուր ողջամիտ նախաձեռնության», սակայն թե ողջամիտ առաջարկությունը որն էր, վարչապետի խոսքում նշված չէ:

Արտահանման, մասնավորապես, գյուղմթերքի արտահանման խնդիրների հետ newspress.am-ը զրուցեց Հայաստանի գործատուների միության նախագահ Գագիկ Մակարյանի հետ: Տնտեսագետը նշեց, որ արտահանումը դեպի Ռուսաստանի Դաշնություն չի ստացվում, քանի որ կան մի քանի խնդիրներ, նախ Հայաստանում դանդաղ են արձագանքում իրավիճակին, կոնստրուկտիզացված չէ պրոցեսը: Տնտեսագետը հիշեցրեց, որ մեկ տարի առաջ նույնպես լավ հնարավորություն կար դեպի Ռուսաստան արտահանումները խթանել և ավելացնել, երբ Արևմտյան երկրները պատժամիջոցներ սահմանեցին ՌԴ-ի նկատմամբ, սակայն իրավիճակը առանձնապես չփոխվեց. խոսեցին, շարժվեցին, սակայն հայ արտահանողները չկարողացան իրավիճակից օգտվել և արտահանում կազմակերպել. և Չիլին, և Թուրքիան գրավեցին ռուսական շուկան:

«Այժմ էլ հայկական ապրանքների համար ՌԴ-ում տեղ է բացվել և հայկական ապրանքները կարող են մտնել ռուսական շուկա»,- ասաց Գ. Մակարյանը, հավելելով, որ այստեղ խնդիր կա. թուրքական ապրանքներն առավել էժան էին, քան հայկականը, հայկական կողմը ունի նաև լոգիստիկայի՝ տրանսպորտի խնդիրներ: Ըստ նրա, Հայաստանում զարգացած չէ սառնարանային տնտեսությունը, դեռևս չեն կարողանում պահպանել գյուղմթերքը, կանոնավոր կազմակերպել արտահանում, ամեն տարի առաջնում է մթերքի պահպանման, արտահանման, վճարումների խնդիրներ, իսկ ռուսական շուկան ցանկանում է կանոնավոր գյուղմթերքի ստացում, որը դեռևս Հայաստանը չի կարողանում ապահովել: Տնտեսագետը շեշտեց, որ այստեղ միայն գյուղնախարարության խնդիր չէ, այլ մի քանի նախարարություններ պետք է համատեղ աշխատեն, սակայն դեռևս արտահանման խնդիրները չի լուծվում: