Ադրբեջանը չի վերադարձնում գերիներին` նոյեմբերի 9-ի պայմանավորվածությամբ, քանի որ ասում են՝ բոլորն ամսի 9֊ից հետո են գերեվարվել. Գուրգեն Արսենյան (տեսանյութ)

Անհետ կորածներ և գերեվարված զինվորների ծնողներն ու հարազատներն ԱԺ շենքի դիմաց փորձում են պարզել, թե ինչպես է դասավորվելու իրենց գերեվարված զինվորի ճակատագիրը` ԱԺ նախագահ Ալեն Սիմոնյանի հայտնի հայտարարությունից հետո։

Նրանք փորձում են պատասխան ստանալ ԱԺ մուտք գործող պատգամավորներից:

ՔՊ խմբակցության պատգամավոր Գուրգեն Արսենյանին տեսնելով, զինծառայողների հարազատները հարց ուղղեցին նրան, թե ինչ էր նշանակում Ալեն Սիմոնյանի հայտարարությունը։

«Քաղաքացիներն, ովքեր գտնվում են գերության մեջ, ոչ մի անգամ ՀՀ իշխանությունների ուշադրությունից դուրս չեն գալու»,- ասաց Արսենյանը։

Նա նշեց, որ ռազմագերիների իրավունքները պաշտպանված են մի քանի միջազգային կոնվենցիաները, ու շատ կարևոր է, որ Ադրբեջանը ևս նրանց համարի ռազմագերի։
Սակայն Գուրգեն Արսենյանը նկատում է, որ Ադրբեջանն այդպես չի ընկալում բոլոր գերիներին։

Գուրգեն Արսենյանը նկատում է, որ Ալեն Սիմոնյանը կարող էր սխալ բառակապակցություն արտահայտել, բայց, պատգամավորի խոսքով, դա չի նշանակում, թե գերիների հարցով չեն զբաղվելու։

Հարցին, թե այդ դեպքում ինչո՞ւ գերիներին չեն վերադարձնում, հատկապես, որ 2020֊ի նոյեմբերի 9֊ին ձեռք բերած պայմանավորվածության համաձայն նման կետ կա։ Արսենյանն արձագանքեց. «Ադրբեջանը չի վերադարձնում գերիներին, որովհետև ասում են, քանի որ բոլորն ամսի 9֊ից հետո են գերեվարվել»:

Պատգամավորի այս արձագանքը չհամոզեց հավաքվածներին։ Նրանք նկատեցին, որ խոսքը նախկինում հաստատված գերիների մասին է։ Սակայն պատգամավորը ըստ էության չպատասխանեց հարցին` տալով լղոզված պատասխաններ։